Kur filloi së ndërtuari e asfaltimi i rrugës nën rrethrrotullimin e Larishtës, kryetari i Prishtinës, Përparim Rama e kishte vlerësuar si projekt të rëndësishëm e që do ta shkarkonte trafikun e ngarkuar në rrugët “Tirana” e “Bill Klinton”.
“Po punojmë pa ndal që të transformojmë Prishtinën, që të kemi infrastrukturën e duhur në kryeqytetin tonë”, thoshte Rama kur promovoi punimet finale të rrugës në nëntor të 2023-ës.
Por, vetëm 5 muaj pas gjendja është e tillë për shkak të nisjes së punimeve në unazën e kryeqytetit.
Ani se kur u lëshua për qarkullim nuk u promovua si e përkohshme, tani në Komunë po thonë se kjo nuk ka të bëjë me keqplanifikim porse rruga u parapa të shfrytëzohet për një kohë të shkurtër, derisa nuk tregojnë as shifrën e investimit të atëhershme.
“Realisht këtu ka qenë asfalti i vjetër i Prishtinës ku ka pas kyçje direkt për Fushë-Kosovë. E kemi funkionalizu me shumë pak investime dhe i ka ra që me deblloku pjesën e qendrës derisa kemi nis me unazën. Segmenti i ri tash është i funksionalizueshëm, nuk ka asnjë problem,” ka thënë Drejtori i Investimeve Kapitale në Komunë, Krenar Xhaferi.
Por, bazuar në një postim të nënkryetarit Alban Zogaj të nëntorit të 2023-s kjo rrugë në fakt ishte asfaltuar.
Pavarësisht investimit, Xhaferi thotë se planet ua ndryshoi unaza e kryeqytetit edhe pse ky është projekt i kamotshëm.
“Pjesa e unazës që po punojmë, ideja është që e pengon infrastrukturën në këtë rrugë ku e kemi funksionalizu. Nuk është që kemi shtru asfalt, n’këtë segment nuk e kemi prek asnjë meter asfalt. Ka qenë asfalt tjetër në drejtim të unazës së kryeqytetit që në këtë pikë ku jemi, normal që do ketë pilotime. E kemi pa mundësinë që atëherë që me pak investime ta bëjmë të suksesshme sepse ka shkarku shumë kolonë brenda qytetit por me përmbylljen e unazës, mund të ndërohet korsi e punimeve,” shtoi Xhaferi.
Investime të tilla, sipas njohësve të fushës, nuk po analizohen siç duhet nga ana e komunës.
“Forma që u zgjidh nuk është e nivelit të duhur sepse kryqëzohen dy magjistrale dhe vendi është bërë me një rreth që e ngulfat procesin. Tek pyetja konkrete është projekt që e kanë bërë komuna. Qëllimin e kanë me zvoglu ngarkesën në rreth por sipas meje, nuk është analizu problematika e komunikacionit që sillet aty. Si duket, është bërë sa për të bërë një investim,” ka thënë inxhinieri i ndërtimtarisë, Kadri Morina.
Unaza e Kryeqytetit ka qenë njëri ndër premtimet e kryetarit, Përparim Rama para ardhjes në pushtet.
Sipas tij, unaza do ishte zgjidhja e problemit të trafikut në Prishtinë për çka, i njëjti ka kërkuar në vazhdimësi përkrahje nga ekzekutivi.