Spotify, platforma më e madhe për transmetimin e muzikës në botë, ka fshirë këngët dhe faqet e disa artistëve rusë që mbështesin pushtimin e Ukrainës nga Moska.
Ky veprim vjen pasi Bashkimi Evropian vendosi sanksione ndaj disa prej këtyre artistëve.
Ndër artistët e prekur janë Shaman (Yaroslav Dronov), Chicherina, Polina Gagarina, Grigory Leps, Oleg Gazmanov dhe grupi i rokut Lyube, sipas kanalit në Telegram, Rodnoy Zvuk, transmeton REL.
Në fillim të kësaj jave, BE-ja vendosi sanksione kundër Polina Gagarinas dhe Shamanit. Ndërkohë, Chicherina, Gazmanov dhe lideri i Lyube, Nikolai Rastorguev, u sanksionuan nga BE-ja në tetor 2022, ndërsa Leps në dhjetor të po atij viti.
Spotify i dha fund veprimtarisë së vet në Rusi në prill 2022, në përgjigje të pushtimit rus të Ukrainës.
Lufta në Ukrainë ka nisur më 24 shkurt 2022, dhe oresidenti rus, Vladimir Putin, e quan atë “operacion special ushtarak” për të çmilitarizuar Ukrainën.
Perëndimi ka reaguar ndaj Rusisë duke vendosur sanksione të ashpra që kanë goditur ekonominë e këtij shteti.
Si pasojë e luftës, mijëra persona kanë humbur jetën dhe miliona të tjerë janë zhvendosur nga shtëpitë e tyre.