Asociacioni i Gazetarëve të Kosovës (AGK) ka reaguar me shqetësim ndaj deklaratave të fundit të ministres së Drejtësisë, Albulena Haxhiu, lidhur me dorëzimin e informacioneve në Prokurori për akuzat ndaj dy portaleve kosovare.
AGK-ja e ka cilësuar deklaratën e Haxhiut si skandaloze dhe një sulm të drejtpërdrejtë ndaj mediave, duke e akuzuar për ndërhyrje në sistemin e drejtësisë.
“Asociacioni i Gazetarëve të Kosovës është i shokuar me deklaratat e ministres së Drejtësisë, Albulena Haxhiu, për “dorëzimin e lajmit”, në Prokurori për akuzat ndaj dy portaleve kosovare.
Zonja Haxhiu ka thënë pas përfundimit të një interviste në Prokurori se: ‘Ju e keni parë një lajm në RTK, ku në këtë rast është përmendur ‘Nacionalja’ dhe ‘Periskopi’, u publikua në RTK, unë i kam dhënë informacione edhe Prokurorisë në lidhje me këtë lajm. Kjo është media kredibile. Unë i kam ofruar para prokurorisë ato që i kam parë edhe vetë.’ Nëpërmjet kësaj deklarate skandaloze, zonja Haxhiu ka sulmuar përnjëherë mediat dhe ka ndërhyrë në sistemin e drejtësisë”, thuhet në reagim e AGK-së.
AGK-ja i ka bërë thirrje Haxhiut që të përmbahet nga deklarata të tilla dhe i ka kërkuar partisë së saj që të ndalojë fushatën e rrezikshme akuzuese kundër gazetarëve. Sipas AGK-së, veprime të tilla janë të dëmshme për lirinë e medias dhe për pavarësinë e sistemit të drejtësisë në Kosovë.
“AGK-ja e fton zonjën Haxhiu që të përmbahet nga deklarata të tilla dhe nga partia e saj të ndalë fushatën e rrezikshme akuzuese kundër gazetarëve”.