Është bërë muaj prej se Gjykata Kushtetuese njoftoi për vendimet që kishte marrë për Ligjin për Pagën Minimale dhe atë për Byronë për Konfiskimin e Pasurisë së Pajustifikueshme.
Por, kjo Gjykatë ende nuk ka publikuar aktgjykimet e plota.
Për mospublikimin e tyre, kritika ndaj këtij institucioni, kanë adresuar dy nga ministrat e qeverisë Kurti, një ditë më parë.
Ministri i Financave, Hekuran Murati, është ankuar lidhur me Ligjin për Pagën Minimale, kurse ajo e Drejtësisë, Albulena Haxhiu për atë të Byrosë.
Por, kjo qasje e ekzekutivit, sipas ish-gjytarit të Gjykatës Kushtetuese, Kadri Kryeziu, është e gabuar, derisa e vlerëson atë si është presion mbi këtë institucion.
“Ata nuk duhet të bëjnë ndonjë kërkesë apo presion për marrje vendimi sepse çështje që i ushtron Gjykata Kushtetuese nuk kanë të bëjnë me qeverinë, është një gabim nuk kanë të drejtë ministrat të kërkojnë të përshpejtohen procedurat për shkak se ato janë të sanksionuara.”, ka deklaruar Kryeziu.
Kryeziu tutje thotë se Gjykata Kushetetuese nuk ka afat të caktuar për përpilimin e aktgjykimeve dhe se kohëzgjatja e tyre varet nga kompleksiteti i rastit.
“Të gjitha kërkesat që janë në Gjykatën Kushtetuese nuk janë të njëjta, varësisht prej situatës dhe materies që duhet trajtuar, nuk ka ndonjë afat të përcaktuar se kur ato duhet të përfundojnë sepse brenda ka disa probleme të ndërlikuara që janë burokratik e duhet të tejkalohen”, ka vijuar Kryeziu.
Kritikat i vlerëson si ndërhyrje në drejtësi edhe juristi Anton Nrecaj, i cili thotë se nga praktikat e së kaluarës, përpilimi e publikimi i aktgjykemeve të plota merr kohë deri në 1 vit.
“Praktika të cilën e shofim te vendimet e Gjykatës Kushtetuese sidomos ligjeve që janë kontestuar në Gjykatën Kushtetuese, mesatarja është një vit, dmth kur e kemi një aktvendim nga Gjykata, e cila e përfundon një cështje apo ankesë apo cështje që është duke u trajtuar”, ka deklaruar Nrecaj.
Dukagjini ka pyetur edhe Gjykatën Kushtetuese në lidhje me kritikat ndaj saj, por nuk ka kthyer përgjigje.
Kushtetuesja i dha dritën e gjelbër Ligjit për Pagën Minimale, kurse atij për Byronë ia kontestoi 5 nene, derisa e rrëzoi ligjin tërësisht.