Në një fjalim të mbajtur në Këshillin e Sigurimit të Kombeve të Bashkuara, Dmitry Polyanskiy, zëvendës Përfaqësuesi i Përhershëm i Federatës Ruse në OKB, paralajmëroi se Lindja e Mesme mund të jetë në prag të një lufte gjithëpërfshirëse.
Duke shprehur shqetësimin e tij për përshkallëzimin e situatës, Polyanskiy bëri thirrje për një armëpushim të plotë dhe përsëriti mbështetjen e tij për një zgjidhje me dy shtete.
“Vrasja e liderit politik të Hamasit, Ismail Haniyeh, është e rrezikshme për të gjithë rajonin…Ne jemi të shqetësuar se kjo mund të çojë në një konflikt të gjerë që mund të përfshijë më shumë vende”, ka deklaruar ai, raporton BBC.
Në mbledhjen e Këshillit të Sigurimit, përfaqësues të tjerë shprehën gjithashtu shqetësimet e tyre.
Përfaqësuesi nga Franca theksoi alarmin për rritjen e tensioneve dhe kërkoi që Irani të ndalojë mbështetjen e akterëve destabilizues në rajon, duke bërë thirrje për stabilitet.
Përfaqësuesi nga Algjeria e quajti vrasjen e Haniyeh një “akt terrori” nga Izraeli dhe paralajmëroi se “ne jemi në greminën e katastrofës”.
Ai bëri thirrje për një përgjigje të fortë dhe të bashkërenduar nga komuniteti ndërkombëtar për të parandaluar përshkallëzimin e mëtejshëm të dhunës.
Po ashtu, edhe Guajana apeloi për “përmbajtje maksimale” nga të gjitha palët, duke theksuar se sulmet e fundit mund të dëmtojnë seriozisht negociatat për armëpushim në Gaza.
Përfaqësuesi i Republikës së Koresë gjithashtu paralajmëroi se përshkallëzimi i dhunës ka ndikime negative në përpjekjet për një armëpushim të qëndrueshëm.
Mozambiku dënoi sulmin ajror në Iran dhe kërkoi përmbajtje nga të gjitha palët, ndërsa përfaqësuesi nga Japonia shprehu frikën se rajoni është në prag të një lufte të re.
Ambasadori amerikan Robert Wood, në fjalimin e tij, kërkoi që Këshilli i Sigurimit të shqyrtojë masa shtesë për të mbajtur Iranin përgjegjës për veprimet e Hezbollahut dhe Hamasit.
Ai bëri thirrje që liderët rajonalë të ndalojnë armatosjen dhe këshillimin e Iranit, duke theksuar nevojën për masa të forta për të siguruar stabilitetin në Lindjen e Mesme.