Bashkimi Evropian [BE] mbylljen e nëntë pikave të Postës së Serbisë në veri të Kosovës nga autoritetet kosovare e ka konsideruar si “veprim i njëanshëm dhe i pakoordinuar”, ka thënë zëdhënësi i BE-së, Peter Stano.
Stano përmes një komunikate për media ka thënë se ky veprim është shkelje e marrëveshjeve të arritura në dialogun e ndërmjetësuar nga BE-ja.
Stano i bëri thirrje qeverisë së Kosovës “të rishqyrtojë vendimin e saj dhe të gjejë një zgjidhje të negociuar për këtë çështje” në kuadër të bisedimeve.
“Bashkimi Evropian e konsideron mbylljen e sotme të nëntë degëve të Postës së Serbisë në veri të Kosovës nga autoritetet e Kosovës si veprim i njëanshëm dhe i pakoordinuar, që shkel marrëveshjet e arritura nën dialogun e lehtësuar nga BE-ja. Si pjesë e marrëveshjeve sa i përket Telekomunikacionet të arritura në vitin 2013 dhe Planit të Veprimit të rënë dakord më 2015, të dyja palët ranë dakord të diskutojnë për shërbimet postare ‘në një fazë të mëvonshme’, duke pranuar kështu që çështja mund të trajtohet brenda kornizës së dialogut”, ka thënë Stano.
Stano ka thënë se këtë e ka pranuar edhe Autoriteti Rregullativ i Shërbimeve Elektronike dhe Postare i Kosovës.
Stano ka thënë se BE-ja është e gatshme ta përfshijë këtë çështje në agjendën e takimit të ardhshëm në dialog.
“BE-ja pret që palët të zhvillojnë ide konstruktive që mund t’u shërbejnë si bazë për zgjidhje. Veprimet e njëanshme dhe të pakoordinuar nuk mund të ofrojnë zgjidhje për këtë apo ndonjë çështje tjetër që i përket procesit të normalizimit mes Kosovës dhe Serbisë. Mbyllja e shërbimeve ekzistuese të serbëve të Kosovës, pa një marrëveshje të re të rënë dakord paraprakisht, do të ndikojë negativisht në jetën e përditshme të tyre dhe kushtet e jetesës për këtë komunitet. I bëjmë thirrje Qeverisë së Kosovës të rishqyrtojë vendimin e saj dhe të gjejë një zgjidhje të negociuar për këtë çështje në kuadër të dialogut të lehtësuar nga BE-ja”, ka thënë Stano.
Mbyllja e nëntë zyrave postare në veri, Elshani: Operacioni ka kaluar i qetë
Ndryshe, Policia e Kosovës të hënën ka mbyllur nëntë degë të Postës së Serbisë në komunat veriore të Kosovës, që kishin vepruar ilegalisht. Policia ka thënë se informatat i ka marrë nga ARKEP-i.
Në Mitrovicë të Veriut dhe Leposaviq janë mbyllur nga tri objekte, në Zveçan dy, dhe një në Zubin Potok.
Elshani për aksionin në veri: Në Leshak ndaluam dy persona për mospërfillje të urdhrit të policëve