Në orët e para të së premtes trupi i pajetë i Faton Hajrizit ka mbërritur në Kosovë.
Pas disa javësh qëndrimi në Lloznicë të Serbisë, trupi i pajetë i Hajrizit është sjellë mbrëmë përmes pikës kufitare në Merdar.
Familjarët e Faton Hajrizit gjatës ditës kanë qëndruar përpara Institutit të Mjekësisë Ligjore (IML), në Prishtinë.
Në fotografitë e siguruara nga ekipi në terren i TV Dukagjinit shihet se e pranishme përpara IML-së ishte nëna dhe vëllai i Faton Hajrizit.
Ata hynë në objektin e IML-së të veshur me maska dhe doreza.
Drejtori i Departamentit të Laboratorëve Mjeko-Ligjor në Institutin e Mjekësisë Ligjore, Agron Thaqi, ka thënë se trupi i Faton Hajrizit tanimë është identifikuar edhe nga familjarët e tij.
“Mbrëmë rreth orës 1 është pranuar trupi i pajetë i cili është i Faton Hajrizit. Këtë po e deklarojmë pas urdhrit që është bërë nga Prokuroria, respektivisht nga prokurori përgjegjës. Është identifikuar nga familjarët e rastit në pranimin e mjekut kujdestar”, ka thënë Thaqi para mediave.
Ministria e Punëve të Jashtme ka thënë se pas mbërritjes së trupit “institucionet e Kosovës po kryejnë procedurat e mëtejshme mjeko-ligjore për identifikimin dhe verifikimin e tij”.
Faton Hajrizi ishte vrarë më 19 korrik të këtij viti në Lloznicë të Serbisë, nga ana e policisë serbe.
Trupi i Faton Hajrizit kthehet në Kosovë, MPJD: Po kryhen procedurat mjeko-ligjore