Kryeministri i Kosovës, Albin Kurti, është takuar me senatorin Chris Murphy në Shtetet e Bashkuara të Amerikës (ShBA) në margjina të Konventës Kombëtare Demokratike.
Në këtë takim, shefi i ekzekutivit ka kërkuar nga ShBA-ja që të bëjë presion te Serbia për dorëzimin e kriminelit, Milan Radojçiq, në Kosovë, i cili pranoi se është përgjegjës për sulmin terrorist në Banjskë të Zveçanit më 24 shtator.
“Tash kur po bëhen 11 muaj të vrasjes së rreshterit tonë policor Afrim Bunjaku në Banjskë të Zveçanit, është koha e fundit që kryekrimineli Millan Radojçiq t’i dorëzohet autoriteteve të drejtësisë së Kosovës dhe për këtë Kryeministri Kurti kërkoi që ShBA-të të bëjnë trysni mbi Beogradin zyrtar”, thuhet në njoftimin e kryeministrisë.
Pjesë e diskutimit ishte edhe dialogu Kosovë – Serbi, me ç’rast Kurti ka theksuar se për t’u zbatuar Marrëveshja Bazike nevojitet pranimi i saj edhe nga ana e Serbisë, duke e nënshkruar atë si dëshmi e garanci të angazhimit në zbatimin e marrëveshjes.
Tutje, shefi i ekzekutivit ka thënë se Serbia duhet të kthehet te marrëveshja dhe ta respektojë atë në mënyrë që e njëjta të zbatohet.
“Në lidhje me dialogun me Serbinë, kryeministri Kurti theksoi përkushtimin e Kosovës në zbatimin në plotni të Marrëveshjes Bazike dhe Aneksit Implementues të Ohrit. Ai shtoi se për t’u zbatuar marrëveshja, nevojitet pranimi i saj edhe nga ana e Serbisë, duke e nënshkruar atë si dëshmi e garanci të angazhimit në zbatimin e marrëveshjes. Kryeministri Kurti nënvizoi se Serbia duhet të tërheqë letrën e dërguar drejt Bashkimit Evropian nga ana e ish-kryeministres Brnabiq dhjetorin e vitit të kaluar, përmes së cilës shprehet refuzimi dhe tërheqja nga marrëveshja nga ana e Serbisë. Serbia duhet të kthehet te marrëveshja dhe ta respektojë atë në mënyrë që e njëjta të zbatohet. Nuk ka zbatim të marrëveshjes sepse para së gjithash nuk po ka respektim të saj”, thuhet tutje në komunikatë.
Në këtë takim, Kurti nënvizoi edhe “marrëdhëniet e fuqishme” me ShBA-në, duke shprehur interesimin për thellim të bashkëpunimit.
“Së pari, duke theksuar marrëdhëniet e fuqishme me Shtetet e Bashkuara të Amerikës, kryeministri Kurti shprehu interesimin e tij për rritjen e bashkëpunimit e shkëmbimit tregtar dhe ekonomik me aleatët e partnerët tanë amerikanë. Më tej, ata biseduan edhe rreth zhvillimeve në vend, situatën e sigurisë në rajon dhe rëndësinë e bashkëpunimit mes shteteve të Ballkanit Perëndimor, si dhe momentin e rëndësishëm në politikën amerikane në kuadër të zgjedhjeve të ardhshme të 5 nëntorit”.
Kurti e ka falënderuar senatorin Murphy për takimin dhe bisedën, duke shprehur mirënjohjen për “mbështetjen e vazhdueshme të tij” ndaj Kosovës.