Kthimi në bankat shkollore është afruar e kjo nënkupton edhe pajisjen me tekste shkollore të nxënësve.
Në librarinë “ABC” në Gjilan, shitjen e tyre e kanë nisur që nga e hëna me pranimin e teksteve nga shtëpia botuese “Dukagjini”.
E pronarja, Afërdita Mehmeti thotë se interesimi ka qenë i lartë.
“Me tekset shkollore jemi furnizu me 20 gusht. Ka qenë hapësirë e mire me prindërit, 90 përqind e librave kanë ardh…, përndryshe të Dukagjinit i kemi të gjitha. Veç e treat ditë është që ka fluks të madh, siç po e shihni edhe vet, ka numër të madh të prindërve që po kërkojnë të furnizohen me libra”, ka thënë pronarja e librarisë “ABC”, Afërdtia Mehmeti.
Mehmeti thotë se më së shumti kërkesa ka nga prindërit fëmijët e të cilëve, janë në klasën e gjashtë dhe nëntë.
E me nisjen e procesit, prindërit shprehen të kënaqur se pajisjen me tekste për fëmijët e tyre po e kanë të lehtë.
“I morra librat, të gjitha i gjeta. Boll jom tut që kam me prit në rend po jo, mirë kryva punë, të gjitha u gjenden”, ka thënë Çlirim Bunjaku, prind.
“Nuk është e vështirë se në librarinë “ABC” po gjinden të gjithë librat, ska probleme për ata që po i kërkojnë. Këtu në librari u gjendën të gjitha librat që më nevojiteshin”, ka thënë një prind tjetër, Azem Mujku.
Për nxënësit e Gjilanit, libraria “ABC” do të jetë e hapur nga ora 9:00 deri në 22:00, për t’u pajisur me tekste shkollore.