Zëvendësministri i Drejtësisë, Blerim Sallahu, ka thënë se i kanë bërë ndryshimet e duhura që i ka kërkuar Gjykata Kushtetuese në vlerësimin e saj për Ligjin për Byronë e konfiskimit të pasurisë së pajustifikueshme.
Sallahu në “Five” të TV Dukagjinit, tha se dy muaj kanë qenë të mjaftueshme për t’i ndryshuar tri nenet që Gjykata Kushtetuese ka vlerësuar se janë në shpërputhje.
“Nuk është i ngutshëm, gjykata i ka gjetë në shpërputhje vetëm tri nene, për këto dy muaj kanë qenë të mjaftueshme… kemi punuar mbi këto amendamente, janë tri nene të caktuara, i kemi sqaru me ekspertë, i kemi plotësu për aq sa kemi pasur nevojë, nuk kanë qenë shumë problematike nenet e adresuara nga gjykata, shumë shpejt do nisen për qeveri dhe kuvend”
“Pika e parë është e rëndësishme është reatroktiviteti, në kuptimin e reaktivitetit i ka dhënë dy propozime, njëri të jetë në përputhje me ligjet e tjera në fuqi, ose duhet të zbatohet pamundësia objektive, që në momentin që palës i bie barra në kuptimin e provuarit, nëse ai dokument nuk mund të gjendet nga pala, i bie që lënda pushon. Këtë koncept e kemi futur në projektligj, secila palë ka të drejtë të kërkoj urdhër nga gjykata ku gjindet ai dokument, nëse se ka atë dokument i bie që lënda pushon, konfiskimi nuk ndodhë”, vijoi ai.
Tutje ai tha se një nga ndryshimet është edhe anëtarësimi në komision, anëtarët e të cilëve do zgjedhen me konkurs e pastaj do zgjidhen nga Kuvendi.
“Gjykata Kushtetuese i ka gjet te komisioni kundërkushtetues tre anëtar, anëtarin për parandalim të korrupsionit, një gjyqtar dhe një person tjetër i një institucioni të pavarur. Këta janë zëvendësu me konkurs, secili person ka të drejt të aplikojë dhe të zgjidhet nga Kuvendi… Aplikojnë, hapet konkursi zgjidhet nga Kuvendi”, tha ai.
Sallahu u shpreh se nuk ka asnjë shans që të ketë ndikim politik.
“Nuk ka shans as kryesuesi as dikush tjetër të ketë ndikim politik, është e pamundshme që dikush mbi këtë agjenci për ndikim politik. I ka 71 nene, gjithçka vendoset në Gjykatë, vetëm nëse politizohen gjykatat atëherë diçka tjetër”, tha ai.