Kryeministri i Kosovës, Albin Kurti së bashku me ministrin e Mbrojtjes, Ejup Maqedonci dhe ministrin e Financave, Hekuran Murati, kanë takuar Komandantin e Forcës së Sigurisë së Kosovës, gjenerallejtënant Bashkim Jashari.
Kurti përmes një postimi në “Facebook”, ka shkruar se kanë diskutuar për mbështetjen e qeverisë ndaj Forcës së Sigurisë së Kosovës (FSK), ku shprehet se asnjëherë nuk ka qenë më e madhe.
“Në Ballkonin e Hapur flasim hapur: një mëngjes pune në kryeministri me Komandantin e Forcës së Sigurisë së Kosovës, gjenerallejtënant Bashkim Jashari, ministrin e Mbrojtjes, Ejup Maqedonci dhe ministrin e Financave, Punës dhe Trasfereve, Hekuran Murati. Diskutuam planet dhe mbështetjen e Qeverisë që asnjëherë nuk ka qenë më e madhe e më e lartë,” ka shkruar Kurti.
Duke shtuar mëtej se prioritet i qeverisë është zhvillimi i ushtrisë, në shërbim të mbrojtjes.
“Zhvillimi dhe fuqizimi i ushtrisë në shërbim të mbrojtjes dhe sigurisë së vendit është ndër prioritet tona kryesore, andaj po punojmë çdo ditë që FSK-ja të jetë sa më moderne, sa më e fortë dhe po aq profesionale,” shkruan Kurti.
