Presioni ndaj gazetarëve, mediave, analistëve sportivë e panelistëve të ndryshëm që marrin pjesë në emisionet sportive po vazhdon.
Tani, jo vetëm nga Federata e Futbollit të Kosovës, por edhe nga klubet, të cilat hapësirën televizive e kërkojnë plotë herë kur iu bëhet padrejtësi në fushën e blertë, por edhe jashtë saj.
Klubet e futbollit në vendin tonë kanë nisur një fushatë, të martën pasdite, duke i dalë në mbrojtje FFK-së, e duke “sulmuar” emisionet sportive.
Përveç emisioneve sportive, po “sulmohet” edhe gazetari i njohur, Baton Haxhiu.
“Sefte” me një komunikatë absurde ia bëri FC Ballkani, e pas saj vazhduan edhe shumica e skuadrave të tjera.
“Federata e Futbollit të Kosovës është organizata më e lartë e këtij sporti në shtetin tonë, të gjitha garat ku bëjmë pjesë janë nën ombrellën e saj, andaj ne jemi të prirur ta respektojmë maksimalisht këtë organ dhe e mbështesim në çdo rrugëtim që ka të bëjë me interesin e futbollit nacional”.
“Në disa emisione sportive po lejohet tentim degradimi i gjithë punës së madhe që ne kryejmë, sakrificës së jashtëzakonshme që bëjmë, vetëm e vetëm që ta shtyjmë përpara agjendën kombëtare të fuqizimit të progresit në futbollin tonë”, thuhet ndër të tjerash në komunikatën e Ballkanit, të cilën e kanë bërë “copy-paste” edhe disa ekipe të tjera.
Ndërsa, ndryshime të vogla në komunikatë kanë pasur një pjesë tjetër e klubeve.
E gjithë kjo fushatë nisi pasi gazetari Baton Haxhiu, të dielën në mbrëmje, në emisionin “Dueli Sportiv” në TV Dukagjini pati akuza të shumta ndaj kryetarit të FFK-së, Agim Ademi dhe institucionit që udhëhiqet nga ai.
FFK me gjasë “e prekur” nga deklaratat e Haxhiut, të hënën, kërkoi nga Komisioni i Pavarur i Mediave dhe Asociacioni i Gazetarëve të Kosovës të ndërhyjnë në emisionet sportive.
Këtë kërkesë të FFK-së, nuk e mori parasysh AGK-ja, që e konsideroi si formë të presionit ndaj mediave dhe gazetarëve.
Gjithashtu, edhe një shkrim i gazetarit Baton Haxhiu me titullin “Heshtja e Blerë nga Agim Ademi, ose kur Gazetarët e Sportit Braktisin të Vërtetën dhe Zgjedhin heshtjen” ishte shkas që të krijojë “zhurmë” në komunitetin e futbollit.