Kryetari i Nismës Socialdemokrate, Fatmir Limaj, lidhur me zhvillimet infrastrukturore në Kosovë, ka përmendur mungesën e projekteve të reja në dekadën e fundit.
Sipas Limajt, për 10 vite nuk është realizuar asnjë projekt që mund të rivalizojë ato që janë bërë në vitin 2010.
“Prej Aeroportit të Prishtinës, shteti i Kosovës ka përfituar 180 milionë euro. Këto janë shifra konkrete, dhe çdo ditë qarkullojnë njerëz nëpër Aeroport dhe autostradë. Çka është më e keqja, për 10 vjet nuk kemi pasur ndonjë projekt më të mirë”, ka deklaruar Limaj, duke e përmendur autostradën për Shkup si projektin e tij të dizajnuar dhe të gatshëm për fillimin e punimeve që nga viti 2010.
Ai ka shtuar se autostrada për Shkup, projektuar nga një kompani franceze, ishte përfunduar me tri variante brenda një viti e gjysmë.
Duke përmendur urën e Milloshevës për Podujevë, Limaj kritikoi zvarritjet në përfundimin e projekteve infrastrukturore.
Sipas Limajt, projekti ishte nënshkruar në vitin 2018 me afat për përfundim brenda 30 muajsh, por pandemia vonoi realizimin e tij.
“Për 14 vjet nuk është kryer projekti për të lidhur Milloshevën me Podujevën dhe Mitrovicën”, ka theksuar Limaj.
Ai ka theksuar se për realizimin e projekteve madhore duhet një klimë pozitive pune dhe bashkëpunim midis qeverisë dhe operatorëve që nënshkruajnë kontratat.
“Duhet me kriju klimën e punës dhe jo të krijojmë frikë te punëtorët. Partneri më i madh i qeverisë janë operatorët ekonomikë”, ka thënë ai.