Dejona Mihali, koordinatorja e Komiteteve në Lëvizjen Vetëvendosje, u intervistua të premten për tri orë nga Prokuroria Speciale në Prishtinë në cilësinë e dëshmitares për disa çështje penale.
Në “FIVE” të Dukagjinit, avokati Xhedet Smakiqi deklaroi se roli i Mihalit në “mafien energjetike të Ballkanit” mund të jetë shumë më i madh se thjesht një dëshmitare.
Smakiqi vlerësoi se Dejona Mihali, e cila ka mbajtur një profil të ulët gjatë viteve të qeverisjes së Lëvizjes Vetëvendosje, është në realitet një figurë kyçe me fuqi të madhe në vendimmarrje politike dhe menaxhimin e zyrtarëve të kësaj partie në institucionet publike.
“Duke e parë që tri apo katër vitet e qeverisjes së VV-së, Dejona si një person anonim, misterioz që është paraqitur në publik shihet edhe nga ana e të gjithë personave që marrin vesh në politikë se ajo është eprore e të gjithë zyrtarëve të VV-së nëpër institucione publike, qoftë nëpër ministri, qoftë në komuna. Dhe ka një fuqi të madhe të vendimmarrjes politike. Dhe unë vlerësoj që momentalisht ajo mund të jetë dëshmitare, por siç e kemi parë, Dejona Mihali është kupola e subordimit të të gjithë anëtarëve të LVV-së, ndoshta përshirë edhe Kurtin, sepse roli i saj dhe vendimet e saj kanë pasur efekt direkt edhe në në ndërmarrjet publike.
Në kryerjen e hetimeve në këtë po quhet në media si ‘mafia energjetike’ në Ballkan, roli i saj do të jetë shumë më i madh sesa ja një dëshmitare e thjeshtë”, ka thënë Smakiqi.