Në mes të Izraelit dhe Iranit konflikti është përshkallëzuar më shumë, ku tani ka vazhduar edhe në Liban.
Zgjim Hyseni nga Partia Socialdemokrate (PSD), i ftuar në emisionin “FIVE”, në TV Dukagjini, ka thënë se këto janë zhvillime shqetësuese të cilat sipas tij mund të çojnë në eskalim të konfliktit.
“Ka zhvillim shqetësues drejt eskalimit të konfliktit, dhe bërjes së këtij konflikti së paku regjional, krejt indikacionet kanë treguar që Izraeli e ka kërkuar një gjë të tillë prej fillimit, për me çdo kusht mos të ndalet lufta dhe me çdo kusht me tentu me gjet mënyra për me mbrri Iranin,” tha Hyseni.
Hyseni thotë se pasi në Gazë të Palestinës, kryeministri izraelit, Benjamin Netanyahu nuk mori shumë kundërpërgjigje, ai u kthye nga Hezbollahu.
“Mundësitë rriten se sa më afër Iranit më afër është edhe ndihma direkte e SHBA-ve, Netanyahu nuk ka gjetur kundërpërgjigje shumë nga Gaza dhe është kthyer nga Hezbollahu, dhe tash e ka arritë në njëfarë mënyre konfliktin deri te Irani,” shtoi Hyseni.
Ndërsa, eksperti i çështjeve ndërkombëtare, Selam Hajrizi, thotë se e gjithë kjo mund të eskalojë në një konflikt të ashpër.
“Mund të eskalojë në një konflikt global mes Izraelit dhe Iranit, Benjamin Netanyahu nuk është hera e parë që e kërcnon Iranin se në rast sulmi Izraeli do kundërpërgjigjet në format më drastike të mundshme, as Irani nuk është hera e parë që sulmon Izraelin me sulme balistike, e kishte bërë edhe në prill por jo në këtë formë. Izraeli mund ta shfrytëzojë momentumin e kësaj periudhe të luftës që armët bërthamore të Iranit të mos vazhdojnë,” tha Hajrizi.