Deputetja e Lidhjes Demokratike të Kosovës (LDK), Hykmete Bajrami, e ka kritikuar ashpër vendimin e Qeverisë së Kosovës për të rritur për 20 për qind pensionet, duke e quajtur atë një “tentativë për të blerë vota” dhe një “skemë të korrupsionit publik”.
Në një postim në rrjetet sociale, Bajrami shprehu shqetësimin se rritja e pagave dhe pensioneve, si dhe shpërndarja e taksave të qytetarëve, në kohë fushate paraelektorale, tregon se Qeveria nuk ka prioritetin e duhur për qytetarët.
Kurti njofton rritjen e të gjitha pensioneve për 20 për qind
“Rritja e pagave, pensioneve dhe shpërndarja taksave të qytetarëve në çfarëdo forme, në kohë fushate elektorale, është tentativë me ble vota, është skemë e korrupsionit publik.
Nëse Albini Kurti e Hekuran Murati do të brengoseshin për qytetarë, ata pensionet dhe pagat do t’i indeksonin për normën e inflacionit që në vitin 2022, por kjo nuk ndodhi sepse atëherë nuk kishte zgjedhje.
Rritja e pensioneve sot 20%, nuk është e mjaftueshme sepse vetëm norma e inflacionit që ka ndodhë gjatë qeverisë Kurti është 22%”, ka shkruar Bajrami në Facebook.