Kryeministri i Kosovës, Albin Kurti, ka takuar Drejtorin Politik të Ministrisë së Punëve të Jashtme të Gjermanisë, Günter Sautter, e që në takim u shoqërua nga Ambasadori i Gjermanisë në Kosovë, Jörn Rohde.
“Kryeministri e falënderoi z. Sautter për vizitën dhe shprehu mirënjohjen e tij për ndihmën dhe mbështetjen diplomatike, ushtarake dhe ekonomike të Gjermanisë e cila kanë qenë thelbësore për çlirimin, pavarësimin dhe ndërtim e zhvillimin e vendit tonë,” thuhet në njoftimin e Zyrës së Kryeministrit.
Në takim thuhet se u bisedua për rezultatet e Procesit të Berlinit, përfshirë gjashtë takimet ministeriale, dhe vlerësuam si arritje të rëndësishme marrëveshjen e re për Qasjen në Arsimin e Lartë dhe Deklaratën për Planin e Veprimit të Tregut të Përbashkët Rajonal (CRM) 2025–2028.
Gjatë takimit u diskutua për forcimin dhe thellimin e marrëdhënieve bilaterale ndërmjet Republikës së Kosovës dhe Gjermanisë, si dhe për bashkëpunimin rajonal, dialogun në Bruksel dhe integrimet euro-atlantike.
“Kryeministri e uroi z. Sautter për pozitën e re në Ministrinë e Punëve të Jashtme dhe i ofroi bashkëpunimin e plotë në avancimin e agjendës së përbashkët në mbrojtjen dhe avancimin e demokracisë dhe lirive themelore.”