Zëvendëskryeministri i Parë për Integrim Evropian, Zhvillim dhe Dialog, Besnik Bislimi, ka marrë pjesë në takimet e radhës të dialogut ndërmjet Kosovës dhe Serbisë, të zhvilluara në Bruksel.
Gjatë këtyre takimeve, siç njofton zyra e Kryeministrit, që përfshinë një seancë bilaterale dhe një trilaterale, u trajtuan një sërë temash të rëndësishme për zbatimin e Marrëveshjes Bazike dhe Aneksit të Ohrit.
Në takimin bilateral me përfaqësuesin special të BE-së për dialogun, Miroslav Lajçak, Bislimi shprehu rëndësinë e zbatimit të kësaj marrëveshjeje në tërësi dhe pa vonesa të mëtejshme.
“Fillimisht, u mbajt një takim bilateral me Përfaqësuesin Special të BE-së, emisarin Miroslav Lajçak, ndërsa më pas u mbajt dhe një takim trilateral. Në takimin bilateral u trajtuan një mori temash, gjersa në takimin trilateral, temë e diskutimit ishte e paraparë sipas agjendës rruga përpara me zbatimin e Marrëveshjes Bazike dhe Aneksit të Ohrit”, thuhet në njoftim.
Bislimi thotë se takimi me Petkoviqin në Bruksel përfundoi pa rezultat “në tema të rëndësishme”
Ndërkaq, nga Brukseli, Bislimi ka thënë se takimi mes tij dhe homologut të vet serb, Petar Petkoviq, nën ndërmjetësimin e të dërguarit të Bashkimit Evropian, përfundoi pa “asnjë rezultat në temat e rëndësishme” të enjten në Bruksel.
Sipas njoftimit, Bislimi gjithashtu nënvizoi nevojën për të nënshkruar marrëveshje të reja si garanci për zbatimin e tyre, duke përmendur pengesat e krijuara nga Serbia, që refuzon marrëveshjen dhe vazhdon të vendosë vija të kuqe që shkelin frymën e dokumentit.
Ai gjithashtu kërkoi që Serbia të tërheqë letrën e depozituar nga ish-kryeministrja Ana Brnabiq dhe të dorëzojë Millan Radoiçiqin, të akuzuar për organizimin e aktit terrorist në Banjskë.
“Në takimin bilateral me emisarin Lajçak si dhe në atë trilateral, zëvendëskryeministri Bislimi theksoi domosdoshmërinë e zbatimit të Marrëveshjes Bazike dhe Aneksit të Ohrit, e atë në tërësi dhe pa vonesa të mëtejme, përmes një plani të sekuencimit të drejtë dhe të barabartë mes palëve.
Ai nënvizoi dhe nevojën për nënshkrimin e marrëveshjeve, si garanci për zbatim të saj, patur parasysh refuzimin e vazhdueshëm të marrëveshjes nga Serbia dhe vijat e saj të kuqe që shkelin frymën dhe nenet e marrëveshjes, nevojën për tërheqjen e letrës së deponuar nga Serbia përmes ish-kryeministres Brnabiq dhe dorëzimin e kryekriminelit dhe terroristit Millan Radoiçiq nga ana e Serbisë, si kryesi i aktit terrorist të Banjskës”, thuhet më tej në njoftim.
Një tjetër temë e rëndësishme e trajtuar në takimin bilateral ishte çështja e personave të pagjetur, ku Serbia akuzohet se po pengon përparimin në zbatimin e deklaratës së përbashkët për këtë çështje.
“Ndërkohë, një nga temat e trajtuara në takimin bilateral me emisarin Lajçak, ka qenë dhe çështja e personave të pagjetur, ku Serbia vijon ta bllokojë zbatimin e deklaratës së përbashkët. Gjithashtu u diskutua edhe për marrëveshjet mbi lirinë e lëvizjes, energjinë dhe vizitat zyrtare. Emisari Lajçak vlerësoi hapjen e qendrës për inspektime teknike në veri, gjersa përmendi që brenda një muaji do të lëshohen linjat e interkoneksionit duke avancuar me zbatimin e marrëveshjes së energjisë”.