Kryetari i Komunës së Pejës, Gazmend Muhaxheri, është sulmuar fizikisht nga dy persona mëngjesin e 26 tetorit në Pejë.
Kryetari i LDK-së, Lumir Abdixhiku, i ka shkuar për vizitë bashkë me anëtarë të kryesisë së subjektit që drejton, kryetarit të Pejës, Gazmend Muhaxherit, pas sulmit fizik që e pati mëngjesin e sotëm.
Abdixhiku përmes një postimi në “Facebook” ka ritheksuar që organet e drejtësisë të zbardhin rastin sa më shpejt të mundin.
“Vizituam mikun tonë Gazin dhe familjen e tij, në shtëpinë e tij në Pejë. E gjetëm edhe më të fortë e edhe më të vendosur në misionin e tij shembullor të udhëheqjes së Pejës – qytetit për të cilin punon me guxim, pasion e energji të pashterrshme.
I bëj thirrje edhe një herë autoriteteve të rendit e drejtësisë t’i marrin hapat e domosdoshëm dhe të menjëhershëm në zbardhjen e plotë të këtij akti të ulët; e në mbajtjen përgjegjës të autorëve që me dhunë e intimidim provojnë të ndalin një udhëheqës të lirë, me plot vullnet e energji!”, ka shkruar Abdixhiku.