Gjatë dëshmisë së tij në Gjykatën Speciale në Hagë, dëshmitari Fatmir Sopi e cilësoi ish-presidentin e Kosovës, Hashim Thaçin, si një “hero të gjallë”,
Kjo deklaratë u bë në momentin kur prokuroria i kërkoi Sopit të identifikonte persona të ndryshëm në disa fotografi të paraqitura si prova.
Në njërën nga fotografitë, Sopi përmendi Thaçin dhe komandantin Rrustem Mustafa, të njohur si “Remi,” dhe tha se përveç tyre, në foto ishin edhe ai vetë dhe Salih Mustafa.
“Të nderuarin presidentin tonë, heroin e gjallë, Hashim Thaçin dhe krah tij shoh komandantin tonë të respektuar, Rrustem Mustafën”, ka thënë Sopi.
Sopi tregoi se këto fotografi mund të jenë shkrepur pas luftës dhe beson se janë bërë në Zllashë, ku ndodhej një qendër stërvitjeje e Ushtrisë Çlirimtare të Kosovës (UÇK) gjatë luftës.