Të paktën 40 persona u vranë në sulmet izraelite në Libanin lindor të mërkurën, sipas ministrisë libaneze të Shëndetësisë.
Një zyrtar izraelit tha se sulmet, në provincat e Baalbek dhe Bekaa, kishin në shënjestër operativët e grupit të armatosur Hezbollah të mbështetur nga Irani, raporton Reuters.
Sulmet izraelite goditën gjithashtu Bejrutin jugor të mërkurën, pasi ushtria izraelite lëshoi paralajmërime evakuimi.
Sulmet izraelite në Baalbek dhe Luginën Bekaa vranë 40 njerëz dhe plagosën 53, tha ministria e shëndetësisë. Ushtria izraelite nuk komentoi.
Izraeli ka goditur vazhdimisht bastionet e grupit të armatosur libanez Hezbollah në periferitë jugore të kryeqytetit Bejrut.
Ushtria izraelite urdhëroi banorët në periferitë jugore të evakuojnë disa vende të mërkurën. Pasuan dy valë bombardimesh, një të mërkurën vonë dhe një tjetër herët të enjten.
Televizioni libanez Al Jadeed raportoi se të enjten pati të paktën katër sulme. Nuk kishte asnjë raport të menjëhershëm për viktima apo detaje mbi atë që u godit.
Sekretari i përgjithshëm i Hezbollahut, Naim Qassem, tha të mërkurën se nuk besonte se veprimet politike do t’i jepnin fund armiqësive.
Ai gjithashtu tha se mund të kishte një rrugë drejt negociatave indirekte nëse Izraeli ndalonte sulmet e tij.
“Kur armiku vendos të ndalojë agresionin, ka një rrugë për negociata që ne e kemi përcaktuar qartë – negociata indirekte përmes shtetit libanez dhe kryetarit (të parlamentit) Nabih Berri”, tha Qassem.
Përpjekjet diplomatike të SHBA-së për të ndalur luftimet midis Izraelit dhe Hezbollahut, të cilat përfshinin një propozim armëpushimi 60 ditor, dështuan javën e kaluar përpara zgjedhjeve amerikane të martën, në të cilat ish-presidenti Donald Trump rimori Shtëpinë e Bardhë.