Shërbimi i Kërkim-Shpëtimit Malor i Kosovës njoftoi të dielën për një rast të ndodhur në rajonin e Artanës (Novobërdës), ku një 7-vjeçar kishte humbur në mal, pranë shtëpisë së tij.
Sipas njoftimit, ai thuhet se kishte dalë për të luajtur dhe dyshohet se kishte humbur orientimin.
Familjarët, të shqetësuar iu bashkuan Policisë së Kosovës në kërkimin për fëmijën, për rreth tre orë, pa mundur ta gjenin.
Ata kërkuan ndihmë nga Shërbimi i Kërkim-Shpëtimit Malor të Kosovës, që menjëherë dërgoi ekipin në vendngjarje.
Ekipi i shpëtimit arriti në orën 13:30, por, sipas njoftimit të publikuar, fëmija ishte gjetur tashmë nga familjarët dhe Policia e Kosovës dhe po kthehej në shtëpi, në gjendje të mirë shëndetësore.
Shërbimi i Kërkim-Shpëtimit i uroi fëmijës “shëndet dhe jetë të gjatë”.