Sot, anëtarët opozitar të Komisionit Hetimor parlamentar për Tekstet Shkollore kanë dorëzuar në Prokurorinë Speciale një kallëzim penal kundër ministres së Arsimit, Arbërie Nagavci.
Kallëzimin penal e kanë dorëzuar deputetët njëherit dhe antarët e këtij komisioni; Shemsedin Dreshaj (kryetar), Ardian Kastrati (nënkryetar), Bekim Haxhiu, Vlora Dumoshi dhe Agim Veliu.
Kryetari i Komisionit Hetimor për Subvencionimin me Tekste Shkollore, Shemsedin Dreshaj ka njoftuar se ka shkelje me bazë ligjore në raportin final të procesit në intervistimin e zyrtarëve të arsimit në vend.
“Komisioni Hetimor për Subvencionimin e Teksteve shkollore për vitin 2023/2024, ka punuar me mandate nga Kuvendi i Kosovës. Ka përmbyllur një proces të intervistimit në prani të ekspertëve të emëruar nga mazhoranca dhe opozita. Ky proces është mbyllur me një raport final, i cili ka mjaft gjetje të shkeljeve ligjore dhe ka bazë për hetimin e mëtejmë prokurorial lidhur me përgjegjësinë e individëve që janë marrë me këtë proces”, u shpreh Dreshaj para mediave.
Raporti i dalë nga puna e Komisionit Hetimor Parlamentar për procesin e subvencionimit të blerjes së teksteve shkollore, përmban konstatime se ky proces është përcjell me parregullsi. Një nga to është dyshimi i keqpërdorimit të rreth 6.3 milion euro. Po ashtu, është specifikuar edhe shkelja e Ligjit të Arsimit parauniversitar pas ndryshimit të praktikës nga shpërndarja e teksteve, në subvencionimin e prindërve për blerjen e tyre.