Presidentja e Kosovës, Vjosa Osmani, ka bërë të ditur se Kosova dhe Kanadaja do të fillojnë Programin e Bashkëpunimit në Trajnim Ushtarak.
Sipas Osmanit, lajmi i është komunikuar gjatë Forumit Ndërkombëtar të Sigurisë në Halifax nga ministri kanadez i Mbrojtjes, Bill Blair.
Në këtë takim, presidentja Osmani ishte e shoqëruar nga ministri i Mbrojtjes së Kosovës, Ejup Maqedonci.
“Një lajm i mrekullueshëm sot nga Halifaksi: Kosova dhe Kanadaja do ta fillojnë Programin e Bashkëpunimit në Trajnim Ushtarak. Së bashku me ministrin e Mbrojtjes Ejup Maqedonci, takuam ministrin e Mbrojtjes të Kanadasë, Bill Blair, i cili na dha lajmin e mirë rreth këtij programi, pas kërkesës që ia kam bërë ish-ministres së Mbrojtjes gjatë vizitës sime të mëparshme në Kanada. Kosova dhe Kanadaja – një partneritet në rritje në dobi të qytetarëve, paqes dhe sigurisë”, ka shkruar Osmani në postimin e saj në Facebook.