Shefja e re e Diplomacisë së Bashkimit Evropian i ka përvjelë mëngët duke përcjell e dëgjuar qëndrimet e palëve që kanë arritur disa marrëveshje e asnjë pajtim që nga viti 2013.
“I takova presidentin Vuçiq dhe kryeministrin Kurti. E vetmja rrugë drejt anëtarësimit në BE është përmes normalizimit të raporteve mes tyre, në bazë të Marrëveshjes së Ohrit. Mirëprita gatishmërinë e tyre për të bashkëpunuar pas sulmit të fundit terrorist. Kryesit duhet të përballen me drejtësinë”, ka tghënë Kallas.
Nga liderët që ka Evropa sot, në konferencën për media Kurti tha se beson se Kaja Kallas është në kohën dhe vendin e duhur.
Nënshkrimi dhe zbatimi i marrëveshjes së Ohrit, tërheqja e letrës së Ana Bërbanbiqit, heqja e masave nga BE, dorëzimi i Radojiçiqit, hetimet për Banjskën, dhe sidomos ato për sulmin terrorist në Ibër-Lepenc, e mbizotëruan agjendën e Kurtit.
“Ka armatim të konfiskuar dhe materiale që janë gjetur. Nga 74 emblema që u konfiskuan, 20 prej tyre janë ruse, prej njësive të ndryshme ruse, të tjerat janë kryesisht serbe. Është edhe një e Ushtrisë Çlirimtare të Kosovës që na bën të mendojmë se dikush ka dashur që hetimet e ardhshme të shkojnë në drejtim të gabuar, apo siç thuhet në fjalorin e NATO-s ‘false flag operation’”, ka thënë Kurti.
Nëse merret për bazë postimi i përfaqësuesit serb, kryediplomatja Kallas atij ia ka përcjell tri porosi, dy ndërlidhen me Kosovën.
“Një bisedë e hapur dhe e vështirë me kryediplomaten europiane, Kaja Kallas. Ata folën për rrugën evropiane të Serbisë, ndërsa përfaqësuesja e lartë i BE-së për politikë të jashtme dhe të sigurisë foli për domosdoshmërinë e dialogut me Prishtinën, zgjidhjen e rastit Banjska dhe vendosjen e sanksioneve ndaj Federatës Ruse. Unë u përgjigja në përputhje me politikën dhe interesat e Serbisë”, ka thënë Vuçiq.
Pasardhësja e Borellit në sytë e vëzhguesve të procesit të bisedimeve nuk do ta ndryshojë trasenë e dialogut, por nëse e do destinacionin e duhur duhet ta ndryshojnë qasjen.
“Një prej çështjeve që unë mendoj se duhet me ndryshu është që Bashkimi Evropian duhet të jetë shumë më i vendosur në sanskione karshi cilës do palë që nuk i përmbush ato për të cilat jemi marrë vesh”, ka thënë analisit Visas Ymeri.
Ymeri mendon se masat ndaj Kosovës kanë arritur në pikën kur nuk dihet se pse janë në fuqi, shto këtu deklaratat publike të BE-së të cilat konstatojnë se Serbia e ka shkelur marrëveshjen e Ohrit.
Përpos temave që u bënë të ditura, analist tjerë politik vlerësojnë se zhvillimet në veri, janë bartur në takimin në Bruksel.
“Ky takim më tepër është për t’u informuar për t’iu transmetuar mesazhin e saj që të dy liderët duhet të jenë të vepërmbajtur, veçanërisht sa i përket zhvillimeve të fundit që ndodhën duke filluar prej 29 nëntorit e deri sot, edhe ashtu kryediplomatja e Kallas e ka bërë të qartë se prioritet i saj primar do të jetë lufta në Ukrainë”, ka thënë analisit Afrim Kasolli.
Kryeministri Kurti dhe Vuçiq do të zhvillojnë takime edhe me presidentin e ri të Këshillit Evropian, Antonio Kosta. Ata do të marrin pjesë edhe në një darkë joformale që Kosta ka organizuar me për të gjithë udhëheqësit e Ballkanit Perëndimor.