Qeveria e Kosovës ka nënshkruar marrëveshje me prodhuesin turk shtetëror të industrisë së mbrojtjes, “Makine ve Kimya Endüstrisi” (MKE), për hapjen e një fabrike moderne të prodhimit të municioneve në Kosovë.
Përmes një postimi në Facebook, kompania turke ka bërë të ditur se kjo fabrikë do të jetë në përputhje me standardet e NATO-s.
“Nënshkruam marrëveshje për themelimin e një fabrike moderne në Kosovë që do të prodhojë municion sipas standardeve të NATO-s. Me këtë kontratë të nënshkruar, ne jemi krenarë që kemi kontribuar në eksportet e industrisë së mbrojtjes së Turqisë duke forcuar industrinë e mbrojtjes së vendit tonë mik dhe vëlla, Kosovën,” thuhet në deklaratën e MKE-së.