Kreu i Aleancës për Ardhmërinë e Kosovës (AAK), Ramush Haradinaj, ka kritikuar ashpër Qeverinë e Kosovës, duke e quajtur atë “Qeveri të territ”, pas mungesës së energjisë elektrike që ka prekur disa qytete të Kosovës për dy ditë rresht.
Haradinaj e ka akuzuar Qeverinë për tentativën e fajësimit të KEDS-it për krizën energjetike në vend.
Ai ka theksuar se gjatë periudhës kur ishte kundërshtuar projekti për ndërtimin e termocentralit “Kosova C” – një projekt që, sipas tij, do ta bënte Kosovën një fuqi energjetike – çmimi i energjisë ishte konsideruar i lartë, ndërkohë që tani qytetarët paguajnë shumë më tepër për energji.
“Kjo Qeveria e territ, ma patën kundërshtuar me krejt fuqinë, projektin e kontraktuar të termocentralit “Kosova C”, që Kosovën e bënte fuqi energjetike, me arsyetimin se çmimi i megavatit prej 80 eurosh, ishte i lartë e sot e paguajnë mesatarisht ka 400 euro; E kundërshtuan gazin amerikan e dolën me bajrak kundër tij; U përfshinë në tregëti të energjisë, deri me GEN-in e Beogradit dhe u vunë në mbrojtje të sekserëve të tyre si Martin Berishaj e Nagip Krasniqi, që kishin shpërdoruar miliona euro të buxhetit të Kosovës; Kur e morën pushtetin, bojshin hajgare me “bojlera e filtera”, ka shkruar Haradinaj në një postim në Facebook.
Ai gjithashtu ka kritikuar rritjen e çmimeve të energjisë elektrike, duke thënë se rryma është shtrenjtuar tri herë pa asnjë përmirësim në furnizim me energji elektrike.