Gjykata Kushtetuese e Kosovës ka vendosur këtë enjte që shkarkimi i Agron Bekës nga pozita e anëtarit jo-prokuror të Këshillit Prokurorial të Kosovës (KPK), nga Kuvendi i Kosovës ishte në përputhje me Kushtetutën.
Sipas vendimit, Gjykata e ka cilësuar kërkesën të pranueshme dhe konfirmoi se vendimi i Kuvendit më 15 dhjetor 2023 nuk ka cenuar pavarësinë e KPK-së dhe nuk është në kundërshtim me kompetencat kushtetuese të Kuvendit.
“Gjykata Kushtetuese e Republikës së Kosovës ka vendosur përkitazi me kërkesën në rastin KO283/23, lidhur me vlerësimin e kushtetutshmërisë së Vendimit [nr. 08-V-668] të 15 dhjetorit 2023 të Kuvendit të Republikës së Kosovës, për shkarkimin e z. Agron Beka nga pozita e anëtarit të Këshillit Prokurorial të Kosovës. Kërkesa për vlerësimin e kushtetutshmërisë së Vendimit të lartcekur të Kuvendit është parashtruar në Gjykatë nga Abelard Tahiri dhe nëntë (9) deputetë tjerë të Kuvendit të Kosovës. Gjykata, ka vendosur, njëzëri, që (i) të deklarojë kërkesën të pranueshme; dhe (ii) të konstatojë se Vendimi [nr. 08-V-668] i 15 dhjetorit 2023 i Kuvendit, nuk është në kundërshtim me paragrafin 9 të nenit 65 [Kompetencat e Kuvendit] si dhe paragrafin 4 të nenit 110 [Këshilli Prokurorial i Kosovës] të Kushtetutës”, thuhet në vendim e Kushtetueses.
Sipas Kushtetueses, shkarkimi ishte bazuar në rekomandimin e Komisionit për Legjislacion, i cili konstatoi shkelje në ushtrimin e detyrave nga Beka.
Kërkesa për vlerësimin e kushtetutshmërisë ishte paraqitur nga deputetët e PDK-së, duke pretenduar se Kuvendi kishte tejkaluar autorizimet e tij.
Megjithatë, Gjykata e refuzoi këtë pretendim, duke theksuar se shkarkimi ishte në harmoni me Ligjin për Këshillin Prokurorial.