Në vitin 2024, qytetarët e Kosovës morën 768.9 milionë euro më shumë kredi në krahasim me vitin 2023.
Milazim Abazi, ekspert i financave, e cilësoi këtë rritje si një zhvillim pozitiv për vendin, duke theksuar se një rritje kaq e madhe është një nga më të lartat në historinë e bankave në Kosovë.
Sipas tij, kjo rritje tregon investime dhe zhvillime ekonomike të qëndrueshme dhe duhet të interpretohet vetëm në terma pozitivë.
“Rritja e kredive është mirë për Kosovën, është pozitive, domethënë zhvillim, rritje e investimeve, është rritje e zhvillimeve. Nëse për një vit është kjo rritje është prej rritjeve më të larta në historinë e bankigut në Kosovë. Kjo interpretohet vetëm me terma pozitivë nuk ka negativ”, ka deklaruar ai.
Ndërkohë, Berat Rukiqi, ish-kryetar i Odës Ekonomike, shprehu shqetësimin për mundësinë e problemeve të likuiditetit nëse ky trend i rritjes së kredive vazhdon.
Ai theksoi se bankat mund të kenë vështirësi për të plasuar kredi të reja, pasi rritja e depozitave është dyfish më e vogël sesa ajo e kredive, që mund të shkaktojë probleme për likuiditetin e institucioneve financiare.
“Nëse vazhdon ky trend edh vitin tjetër, bankat do të kenë problem me plasu kredi të reja. Pra, nëse vazhdon ky trendi rritjes s depozitave, që është dyfish më i vogël sesa trendi i rritjes së kredive atëherë secila bankë do të ketë probleme të caktuara të likuiditetit”, ka deklaruar Rukiqi.