Deputeti i Lidhjes Demokratike të Kosovës (LDK), Avdullah Hoti, ka thënë se me projektin e termocentralit të gazit amerikan do të punësoheshin trefish më shumë punëtorë sesa numri i punëtorëve aktualë në KEK.
Nga opozita thonë se kryeministri i Kosovës Albin Kurti e ka refuzuar atë projekt. Por, opozita kishte akuzuar pushtetin edhe për nepotizëm në KEK.
Por, Hoti përmes një postimi në “Facebook” thotë se LDK-ja nuk ka hequr dorë, ai projekt do bëhet prioritet pas 9 shkurtit.
“Trefish më shumë punëtorë se këta të pranuar sot në KEK do të punësoheshin në termocentralin me gaz amerikan. Për më tepër, do të kishim furnizim stabil me energji elektrike e jo ndërprerje me ditë të tëra gjithandej nëpër Kosovë. Por, Lidhja Demokratike e Kosovës, nuk kemi hequr dorë nga ai projekt i rëndësisë kombëtare për Kosovën. Do ta bëjmë me prioritet pas 9 shkurtit”, ka thënë Hoti.
KEK-u ka pranuar të hënën 220 punëtorë të rinj. Kryeministri i Kosovës, Albin Kurti, ka shpërndarë kartelat e punës për disa nga punëtorët e rinj. Kjo ngjarje ka ndodhur pak ditë para fillimit të fushatës për betejën zgjedhore, që do të nisë më 11 janar, për zgjedhjet e rregullta parlamentare që janë caktuar të mbahen më 9 shkurt 2025.