Lumir Abdixhiku, kandidati për kryeministër i Lidhjes Demokratike të Kosovës (LDK), ka dhënë detaje për projektet e mëdha infrastrukturore dhe sportive gjatë intervistës në “Pressing”.
Një nga këto projekte është ndërtimi i unazës së kryeqytetit, një rrugë 29 kilometra të gjatë, me 6 korsi. Abdixhiku ka deklaruar se ky projekt do të përfundojë për më pak se dy vjet e gjysmë, duke ofruar një zgjidhje për problemet e trafikut në Prishtinë.
“Projekti i parë për Prishtinën është unaza e kryeqytetit. Pra, 29 kilometra gjatësi, rrugë me 6 korsi e dizajnuar tashmë prej komunës. Kjo përfundon për jo më shumë sesa 2 vjet e gjysme. Shpronësimi është problemi. Qeveria duhet t’i jap 154 milionë euro për shpronësim. Tani kur thoni a ka pare, normal që ka para. A i dhanë 70 milionë euro nga 100 euro që s’u ditën ku po shkojnë.” – deklaroi Abdixhiku.
Abdixhiku foli më tej për projektin e Qendrës Sportive ku përfshihet ndërtimi i stadiumit kombëtar në Bernicë, për të cilin tha se do të kushtojë rreth 60 milionë euro.
Projekti përfshin ndërtimin e stadiumit, një Pallat të Sporteve me dorë, një Pishine Olimpike, dhe një Gaming Hall, tha Abdixhiku.
“E dyta, në Bernicë, kemi prezantuar projektin më të avancuar sportiv. Është plan i detajuar. Në Bernicë do të ndërtohet një stadium kombëtar. Është plani, është 65 hektarë. 60 milionë euro është kosto. Është stadiumi, është Pallati i Sporteve me dorë, është pishina olimpike dhe është “Gaming Hall”, tha kreu i LDK-së
Abdixhiku tha gjithashtu se afër qendrës sportive do të ndërtohet edhe Parku Teknologjik.
“Ngjit me qendrën më të madhe sportive do të jetë Parku Teknologjik. Kjo është një ide që unë e kam prezantuar pas takimeve me sektorin e ICT-së.” – tha ai.