Të gjithë ju dashamirë të librit, ju njoftojmë që më 30 janar, ditën e enjte, në orën 18:00, në librarinë “Dukagjini” (te sheshi “Nënë Tereza”) do të bëhet promovimi i librit “Lugina e Lumit Issa” nga autori Czesław Miłosz në kuadër të kolanës “Effugium” – projekt i mbështetur nga Evropa Kreative.
Jua rikujtojmë se “Dukagjini” është shtëpia e parë botuese nga Kosova që është bërë pjesë e projektit kulturor “Evropa Kreative”, me mbështetjen e së cilës sjell edhe librin “Lugina e Lumit Issa” nga autori Czesław Miłosz, i cili vjen në kuadër të kolanës “Effugium”.
Për të diskutuar rreth librit, në panel do të jenë të pranishëm:
Blerim Latifi – profesor universitar
Durim Abdullahu – historian
Promovimi do të moderohet nga Liridona Bytyçi nga shtëpia botuese “Dukagjini”
Shënim për librin:
“Lugina e Lumit Issa” nga autori Czesław Miłosz është pjesë e kolanës “Effugium” – Evropa Kreative dhe është një nga romanet më të dalluara për fëmijërinë dhe adoleshencën e autorit. Libri u shkrua nga Miłosz-i në mërgim dhe u botua për herë të parë në Paris në vitin 1955.
Libri “Lugina e Lumit Issa” është udhëtim në fëmijërinë e autorit në Lituani, si dhe krijim imagjinar i një vendi mitik të kufizuar nga lumi Issa – një analizë artistike e ngjarjeve dhe e fenomeneve të ndryshme. Brigjet e lumit mitik i referohen brigjeve të lumit Niewiaż në jetë reale, ku Miłosz-i kaloi fëmijërinë.
Shënim për autorin:
Czesław Miłosz-i ishte poet, prozator dhe përkthyes polak, i lindur më 30 qershor 1911, në Lituaninë e sotme. Njihet më shumë për poezi që kanë tema si: historia, kujtesa dhe qenia njerëzore. Miłosz-i ishte figurë e shquar në letërsinë e shekullit XX dhe fitoi çmimin Nobel për Letërsi në vitin 1980. Ai kaloi pjesën më të madhe të jetës së tij të mëvonshme në Shtetet e Bashkuara të Amerikës, ku vazhdoi të shkruajë deri në vdekjen e tij, në vitin 2004.
Promovimi është një mundësi e mirë për takim e diskutim më të afërt rreth librit!