Me flamujt e Kosovës dhe Shqipërisë, fluturuan mbi qiellin e Prekazit.
Ndërkaq, anëtarë të Organizatës së Veteranëve të Luftës bënë homazhe edhe tek varrezat e Jasharajve.
E këto ishin vetëm disa nga organizimet që OVL për herë të parë i ka organizuar vet në kuadër të Epopesë së UÇK-së.
Kjo sepse nuk morën pjesë në Këshillin organizativ të Qeverisë së Kosovës për këtë ngjarje madhështore me arsyetimin e qëndrimit sipas tyre të ekzekutivit për veteranët e luftës.
“Në shenjë proteste që nuk kemi pas bashkëpunim të duhur me qeverinë ne kemi bojkotu vetëm Këshillin Organizativ, përndryshe në të gjitha aktivitetet ne marrim pjesë. Normal ne do jemi pjesë e çdo aktiviteti që zhvillohet sepse fundja këto data dhe këto aktivitete janë tonat, qeveritë shkojnë e vinë ne jemi ata të cilët jemi protagonistë dhe pjesëmarrës të këtyre ngjarjeve, dhe këto ngjarje janë bash tonat”, ka deklaruar Fatmir Sopi, Nënkryetar i OVL-së.
Se punët nuk i kanë mirë mes vete, e konfirmoi edhe Albin Kurti në mbledhjen e Qeverisë ku tërthorazi i çoi porosi organizatës së veteranëve.
Kurti: Çdo përvetësim i Epopesë dhe luftës është korruptim i idealit të saj
“Çdo përvetësim i Epopesë dhe i luftës është korruptim i idealit të Epopesë. Epopeja duhet të jetë momenti, në kuptimin e vërtetë të fuqisë së një vektori për të përcaktuar historinë e mëtejshme, pra momenti i sublimimit të sakrificës dhe vuajtjes në krenari të një populli të tërë nga të gjitha trevat”, ka deklaruar Kurti.
Ministri i mbrojtjes Ejup Maqedonci ndërkaq tha se kjo nuk nënkupton që veteranët nuk janë pjesë e organizimeve të tyre dhe anasjelltas.
“Në të gjitha aktivitetet që do ftohem dhe do kemi mundësi të shkoj do shkoj”, ka theksuar Maqedonci.
Ai është pyetur nëse ka qenë i ftuar.
“Nuk kam marrë ndonjë ftesë personalisht për ndonjë aktivitet po unë dihet që jam veteran i UÇK-së, për më tepër deri para disa muajve kam qenë edhe anëtarë i kryesisë së organizatës për Prishtinë”, është përgjigjur Maqedonci.
Megjithëkëtë, udhëheqësit e OVL së UÇK-së nuk janë parë sot në organizimet e Qeverisë, përfshirë ceremoninë kryesore në kazermën “Adem Jashari” në Prishtinë.