Zyra e Rregullatorit për Energji (ZRRE), ka publikuar raportet konsultative për të hyrat maksimale të lejuara për Operatorin e Sistemit të Transmetimit dhe Tregut (KOSTT), Operatorin e Sistemit të Shpërndarjes (KEDS) dhe Furnizuesin e Shërbimit Universal (FSHU).
Sipas këtyre raporteve, pritet që tarifat e energjisë elektrike për konsumatorët të rriten mesatarisht me 15% duke filluar nga muaji prill.
“Raportet konsultative paraqesin propozimet fillestare të ZRRE-së për të hyrat maksimale të lejuara për këto ndërmarrje. Ky publikim ofron mundësinë që të gjitha palët e interesuara të shqyrtojnë propozimet dhe të japin komente dhe sugjerime që mund të ndikojnë në përcaktimin e vendimeve përfundimtare mbi tarifat”, thuhet në njoftim.
ZRRE ka theksuar se raportet konsultative paraqesin propozimet fillestare dhe ofrojnë mundësinë që palët e interesuara të japin komente deri më 28 mars 2025.
“Në këtë kuadër, ZRRE fton ndërmarrjet e rregulluara, konsumatorët dhe të gjitha palët e tjera të interesuara që të shqyrtojnë të dhënat dhe pikëpamjet e përfshira në Raportin Konsultativ dhe të paraqesin komentet dhe sugjerimet e tyre. Komentet mund të dërgohen deri në datën 28 mars 2025”, thuhet në njoftim.
ZRRE insiston se procesi i konsultimit publik do të ndihmojë në krijimin e një politike të qëndrueshme dhe të drejtë për të gjitha palët e përfshira.