Komisioni Qendror i Zgjedhjeve ka publikuar raportet e paaudituara financiare të partive politike për vitin 2024.
Më së shumti të hyra ka partia më e madhe në vend, Lëvizja Vetëvendosje me afro 2 milion e 340 mijë euro.
Prej tyre afro 2 milionë e 260 mijë euro i ka nga buxheti shtetit.
Sikurse të hyrat, kjo parti të mëdha i pati edhe shpenzimet, në total 1 milion e 800 mijë euro.
Shumica e këtyre parave shkuan për paga dhe kompensime, reklama e konferenca, ndërkaq për fushatë LVV gjatë vitit të kaluar i shpenzoi 163 mijë euro.
Kurse PDK-ja, për dallim nga viti i kaluar, sivjet vit e ka shkelur milionin për nga të hyrat, gjithsej 1 milion e 30 mijë euro.
760 mijë nga buxheti i shtetit, afro 200 mijë nga “Hyrat e tjera” siç është paraqitur në raport, afro 50 mijë nga fushata e 30 mijë nga kontributet janë burimet kryesore të të hyrave të partisë së Memli Krasniqit.
Ndërsa shpenzime pati afro 940 mijë euro të cilat kryesisht ishin për paga, reklama, e shpenzime të fushatës.
LDK-ja në anën tjetër ka pasur 643 mijë euro të hyra në 2024-tën, 600 mijë prej të cilave i mori nga buxheti i shtetit.
Ndërkaq të hyrat tjera më të mëdha prej 25 mijë euro i pati nga fushata.
Gjithsej, LDK-ja i shpenzoi 595 mijë euro.
Partisë së Lumir Abdixhikut paratë i shkuan në paga e kompensime, reklama e konferenca, shpenzime të fushatës dhe ato të transportit.
Aleanca për Ardhmërinë e Kosovës nga partitë parlamentare është e vetmja që ka dalë minus vitin e kaluar, pasi të hyrat e saj kanë qenë vetëm 325 mijë e 58 euro ndërsa shpenzimet, siç figurojnë në raport, kanë arritur në 907 mijë e 796 euro, duke krijuar një deficit prej afro 590 mijë euro.
Në këtë diferencë, partia e Ramush Haradinaj ka sqaruar se ndikon blerja e objektit të ri të partisë për 570 mijë euro, shumë kjo e cila sipas AAK-së, do të shlyhet brenda 6 viteve të ardhshme.
KQZ-ja ka theksuar se këto raporte financiare të paaudituara mund të pësojnë ndryshime dhe saktësime gjatë procesit të auditimit.