Papa Françesku ka përshëndetur një turmë të madhe pelegrinësh të mbledhur jashtë spitalit Gemelli në Romë, në daljen e tij të parë publike në më shumë se pesë javë, përpara se të largohej nga spitali të dielën.
Papa, i cili po shërohet nga pneumonia në të dy mushkëritë, e bëri përshëndetjen dhe bekimin e shkurtër nga ballkoni i dhomës së tij të spitalit, pak pas publikimit të tekstit për Engjëllin e tij të së dielës, raporton The Guardian.
“Faleminderit të gjithëve”, i ka thënë turmës Francis, 88 vjeç. Më pas ai mori rrugën për në shtëpi në Casa Santa Marta në qytetin e Vatikanit, ku do të shërohet për të paktën dy muaj.
“Papa ynë po kthehet”, ka thënë një nga pelegrinët për Rai neës.
“Shëndeti i Françeskut, i cili u shtrua në spital më 14 shkurt dhe më pas u diagnostikua me një infeksion të traktit respirator dhe pneumoni të dyfishtë, po përmirësohet vazhdimisht”, u ka thënë gazetarëve të shtunën Sergio Alfieri, një kirurg i përgjithshëm në spitalin Gemelli. Megjithatë, sipas tij, do të duhet ende “shumë kohë” që trupi i tij të shërohet plotësisht.
Françesku ka pësuar dy kriza kritike të frymëmarrjes në spital përpara se mjekët e tij të deklaronin më 10 mars se ai nuk ishte më në rrezik për jetën.
Pavarësisht nga sfidat e tij shëndetësore, disa ditë Françesku ka vazhduar të drejtonte Vatikanin nga dhoma e tij e spitalit, duke përfshirë miratimin e individëve për shenjtërim dhe duke i shkruar një letër redaktorit të gazetës Corriere della Sera duke përsëritur thirrjen e tij për paqe dhe çarmatim.