Presidentja e Kosovës, Vjosa Osmani, ka përkujtuar 26-vjetorin e fillimit të sulmeve ajrore të NATO-s kundër caqeve ushtarake dhe policore serbe, një ndërhyrje që shënoi fillimin e çlirimit të Kosovës.
Në një postim në Facebook, Osmani e ka cilësuar këtë ditë si momentin kur bota demokratike nuk heshti përballë padrejtësisë dhe kur aleatët e NATO-s u ngritën për të mbrojtur popullin e Kosovës nga regjimi gjenocidal i Serbisë.
“24 Marsi, dita kur liria mori krahë! Ishte dita kur aleatët e NATO-s u ngritën kundër së keqes, për ta mbrojtur një popull që po luftonte për ekzistencë, i rrezikuar nga regjimi gjenocidal i Serbisë. Ishte dita kur ndaj errësirës triumfoi drita e shpresës”, ka shkruar Osmani.
Ajo ka theksuar se nga sakrifica dhe lufta çlirimtare lindi Kosova e lirë, e cila sot ecën krenare dhe sovrane drejt një të ardhmeje më të ndritur.
“Lavdi të gjithë të rënëve për liri! Falënderim aleatëve që ndihmuan kauzën tonë për Kosovën shtet të lirë, të pavarur e sovran!”, ka përfunduar presidentja Osmani.