Një shpërthim ka ndodhur te zyrat e reja të Postës së Kosovës në Zveçan, në minutat e parë të së martës, ka konfirmuar zëdhënësi i Policisë së Kosovës, Veton Elshani. Ai ka bërë të ditur, nga detonimi nuk ka pasur të lënduar, ndërsa ka dëme materiale.
“Kemi informacion për një detonim që është dëgjuar te ndërtesa e postës në Zveçan rreth orës 00:30”, ka deklaruar Elshani.
Ai ka thënë se nuk është raportuar për të lënduar.
Ndërkaq, siç ka shkruar mediumi lokal në gjuhën serbe, “kossev.info” objektit i janë thyer xhamat. Ky medium ka raportuar se dhjetëra policë kanë qëndruar në vend të ngjarjes, bashkë me ekipet e deminimit.
Në këtë ndërtesë ishte vendosur shenja e Postës së Kosovës vetëm pak ditë më parë. Deri në mbylljen nga autoritetet e Kosovës vitin e kaluar, aty operonte Banka e Kursimeve Postare serbe.