Kreu i AAK-së, Ramush Haradinaj ka reaguar për sulmin e orëve të para të së martës në zyrën postare të Postës së Kosovës në Zveçan. Haradinaj tha se sulmet e përsëritura ndaj institucioneve të Kosovës dëshmojnë qartë qëllimet agresive të Serbisë.
Haradinaj përmes një postimi në “Facebook” tha se sulmi i mbrëmshëm është vazhdimësi e logjikës terroriste të lidershipit në Serbi.
“Sulmet e përsëritura mbi institucionet e Republikës së Kosovës dëshmojnë qartë qëllimet agresive të Serbisë, andaj edhe sulmi i mbrëmshëm është vazhdimësi e logjikës terroriste të lidershipit në Serbi.
Policia dhe institucionet e sigurisë po dëshmojnë qartë aftësinë dhe gatishmërinë për t’i sjellë para drejtësisë ata që guxojnë të cenojnë rendin dhe ligjin në Kosovë.
Përkrahja për këto institucione duhet të jetë e pa rezervë nga qeveria e Kosovës.
Kosova nuk guxon të kthehet në strehë të terroristëve dhe akteve terroriste, për këtë arsye edhe kërkohet bashkëpunim dhe koordinim i fuqishëm me aleatët tanë të NATO-s në krye me SHBA.”, ka shkruar Haradinaj.