Eugen Cakolli nga Instituti Demokratik i Kosovës (KDI) ka kritikuar kryeministrin në detyrë, Albin Kurti, për organizimin e takimeve konsultative për formimin e qeverisë së re brenda objektit të Qeverisë.
Kurti nis konsultimet me pakicat për qeverinë e re
Sipas Cakollit, një praktikë e tillë është e gabuar dhe nuk duhet të normalizohet, pasi qeveria aktuale është ende në detyrë dhe nuk ka mandatim zyrtar për krijimin e ekzekutivit të ri.
Ai e cilësoi këtë praktikë të gabuar dhe tha se ajo zbeh kufirin mes shtetit dhe partisë
“Nuk është në rregull dhe as s’duhet të normalizohet që takimet “konsultative” për formimin e qeverisë së re të mbahen në ndërtesën e Qeverisë – e aq më pak që për to të lëshojë njoftim Zyra e Kryeministrit. Aq më tepër kur ende nuk ka mandatim zyrtar për formimin e qeverisë, e qeveria aktuale është “në detyrë”.
Kjo nuk është çështje teknike, por një praktikë që zbeh kufirin mes shtetit dhe partisë, dhe që tregon shumë për mënyrën si konceptohet pushteti.
Një subjekt politik që synon të qeverisë vendin duhet të tregojë standarde më të larta – jo të shfrytëzojë hapësirat e shtetit për interesa të veta. Prandaj, takimet konsultative për formimin e qeverisë duhet të mbahen në seli partie ose në ambiente neutrale, e kurrsesi në zyra publike që u përkasin të gjithë qytetarëve”, ka shkruar Cakolli.