Kuvendi i Kosovës nuk e ka miratuar mocionin e dhjetë deputetëve të LDK-së, për shkarkimin e bordit të Zyrës së Rregullatorit të Energjisë (ZRrE).
Në këtë votim kanë marrë pjesë 75 deputetë, pro mocionit kanë votuar 22 deputetë, kundër 53 dhe nuk kishte asnjë abstenim.
Deputetët e opozitës, kanë kërkuar nga Kuvendi i Kosovës, të votojnë pro shkarkimit të bordit të Zyrës së Rregullatorit të Energjisë.
Arben Gashi, ka bërë të ditur se partia e tij LDK, do ta dërgojë në Gjykatë Kushtetuese, vendimin e ZRrE-së, për rritjen e çmimit të energjisë elektrike.
Bashkëpartiaku i tij, Armend Zemaj, ka thënë se ky bord nuk ka arritur t’i mbushë objektivat e tyre dhe t’i mbrojë interesat e qytetarëve.
Zemaj ka folur edhe për shtrenjtimin e rrymës elektrike gjatë stinës së dimrit, ku sipas tij kjo është bërë në mënyrë të paligjshme nga bordi i ZRre-së.
“Ka dy vendime gjyqësore për këtë çështje. Ky bord të shkarkohet dhe të emërohet një bord profesional i pavarur nga politika ”, ka thënë Zemaj.
Edhe deputeti nga Partia Demokratike e Kosovës, Ferat Shala, e ka mbështetur mocionin e propozuar nga LDK-ja, për shkarkimin e bordit të ZRRe-së.
Ai ka thënë se bordi në fjalë, ka manipuluar me shifra, dhe i ka fshehur eksportet e rrymës që sipas tij janë bërë me urdhër të tyre.
“Pasojat e këtyre vendimeve kanë bartur një kosto të lartë financiare. Këto mjaftojnë që ky bord vetë të dorëheqje e jo ne të bëjmë kërkesa për shkarkimin e tij. Këto janë fakte të mjaftueshme për ta shkarkuar sot ketë bord dhe për ta zgjedhur një bord të ri të pavarur”, ka thënë Shala.
Kundër këtij mocioni, është shprehur Shefja e Grupit Parlamentar të Lëvizjes Vetëvendosje, Mimoza Kusari – Lila. Ajo ka thënë se arsyetimet për shkarkim nga LDK, nuk janë të bindshme dhe se sipas saj ka shpërputhje në raport me dispozitat që i parasheh ligji.
Kusari – Lila, ka thënë se bordit aktual të ZRrE-së, opozita po mundohet t’ia faturojë problemet e krijuara që 20 vjet.
“Po mundohet që t’i faturohet situata 20-vjeçare një bordi që ka mandat 1-vjeçar. Duke përmendur të gjitha faktet dhe duke përcjellë ndjeshmërinë në situatën e energjisë, GP i LVV-së nuk e mbështet mocionin dhe rrjedhimisht do të votojë kundër”, ka thënë ajo.
Ndërkaq, për shkak të mungesës së kuorumit prapë Kuvendi i Kosovës ka dështuar ta miratojnë Raportin vjetor të Performancës së Zyrës Kombëtare të Auditimit për vitin 2021.
Po ashtu, nuk pati kuorum as për votimin e Projektligjit për deklarimin, prejardhjen dhe kontrollin e pasurisë dhe të dhuratave dhe as për raportin vjetor të Agjencisë Kosovare të Privatizimit për vitin 2021 nuk pati kuorum.