Të premten e 22 korrikut, do të bëhet ceremonia e hapjes së festivalit ndërkombëtar “Manifesta” e themeluar në fillim të viteve 1990 e cila ndryshon vendndodhjen çdo dy vjet, e që në këtë vit mbahet në Kosovë.
Edicioni i 14-të i Manifesta do të bëjë bashkë 103 pjesëmarrës nga 30 vende të ndryshme.
Aktivitetet që do të mbahen do të zhvillohen në ndërtesat ikonike të hapësirave publike në Prishtinë.
Teuta Hoxha-Jahaj, asistente e drejtoreshës së festivalit “Manifesta14” për RTV Dukagjini ka thënë se të premten duke filluar nga ora 19:00 do të bëhet hapja e madhe e këtij festivali në Pllaton e Pallatit të Rinisë, ku të gjitha hapësirat që vizitohen nga qytetarët do të jenë pa pagesë.
Ajo ka bërë të ditur se në ora 20:00 do të ketë fjalime nga kryeministri i Kosovës, Albin Kurti, presidentja e Kosovës, Vjosa Osmani dhe kryetari i Prishtinës, Përparim Rama.
Përveç tyre, fjalime do të ketë edhe nga Udhëheqësi i Bordit të Manifestës Ndërkombëtare dhe Drejtoresha e Manifestës, Hedwig Fijen.
Ajo ka thënë se është krenare që një festival ndërkombëtar të jetë afër qytetarëve të Kosovës, të cilët kanë mundësinë të shohin vepra të artit e ekspozita të ndryshme.
Hoxha-Jahaj ka thënë se për 100 ditë duke filluar nga 22 korriku deri më 30 tetor, qytetarët e Kosovës mund të shijojnë artin si qytetarët e tjerë të botës.
“Kam kënaqësinë që të përdorim Manifestën si mënyrë që të promovojmë Kosovën në përgjithësi, shpresojmë të kemi 100 mijë vizitorë për këto 100 ditë”, ka thënë Hoxha-Jahaj.