Është nënshkruar memorandumi në mes të Odës Ekonomike të Kosovës dhe Odës Ekonomike Kosovë-Izrael për të forcuar bashkëpunimin në mes të Kosovës dhe Izraelit.
Gjatë nënshkrimit të këtij memorandumi është bërë e ditur se kjo marrëveshja parasheh bashkëpunimin e dy odave në projekte të ndryshme si dhe angazhimin e përbashkët në afrimin e bizneseve të të dyja vendeve.
Kryetari i Odës Ekonomike të Kosovës, Lulzim Rafuna, ka thënë se “marrëveshja parasheh harmonizim të projekteve mes dy odave si dhe bashkërendim të aktiviteteve. E tërë kjo bëhet me qëllim që bizneset e dy vendeve tona të afrohen me njëra-tjetrën dhe të inkurajohet bashkëpunimi i dy ekonomive”.
Të martën e 9 gushtit në ceremoninë e nënshkrimit të Marrëveshjes së bashkëpunimit ishin prezentë edhe Skender Hyseni, Kryetar i Asamblesë së Odës Ekonomike Kosovë-Izrael, si dhe ambasadorja e Izraelit për Kosovën, Tammy Ziv.
Në këtë takim, nga të pranishmit ishte theksuar se duhet të ndërmerren hapa për të inkurajuar thellimin e bashkëpunimit ekonomik në mes të Kosovës dhe Izraelit dhe u zotuan se do të angazhohen për të sjellë në Kosovë investitorë nga Izraeli.