Paneli i Gjykatës Supreme e ka refuzuar kërkesën për mbrojtje të ligjshmërisë lidhur me paraburgimin të parashtruar nga ana e mbrojtjes së ish-kryeparlamentarit të Kosovës, Kadri Veseli, i cili po akuzohet për krime lufte.
Më 30 qershor 2022, kryetarja e Dhomave të Specializuara të Kosovës (DhSK), Ekaterina Trendafilova, kishte caktuar Panelin e Gjykatës Supreme për të vendosur mbi kërkesën e dorëzuar nga mbrojtja e Kadri Veselit më 29 qershor 2022, lidhur me mbajtjen e tij në paraburgim, raporton Betimi për Drejtësi.
Gjykatësit të cilët kanë vendosur për këtë kërkesë janë, Ekaterina Trendafilova (kryesuese), Kristinë van den Vijngart dhe Mihael Bolander.
Më 29 prill Zyra e Prokurorit të Specializuar e kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit.
Kjo bëri që aktakuza ndaj ish-krerëve të UÇK-së të zgjerohet. Ata dyshohen se kanë kryer krime lufte në komunën e Gjilanit, në Budakovë e në Semetishtë.
Ish-krerët e UÇK-së janë deklaruar të pafajshëm për të gjitha akuzat që i rëndojnë ata.