Kryetari i Lidhjes Demokratike të Kosovës, Lumir Abdixhiku, është shprehur i tronditur lidhur me dhunimin seksual ndaj të miturës 11-vjeçare në Prishtinë.
Ai me anë të një postimi në llogarinë e tij në Twitter, ka thënë se ky akt kapërcen çdo ndjenjë njerëzore.
Kreu i LDK-së, ka kërkuar dënim maksimal ndaj kryersve të veprës.
“I trishtuar nga lajmi shokues i përdhunimit të një fëmije 11 vjeçe. Akt që kapërcen çdo ndjenjë njerëzore. Një alarm i dhimbshëm për shoqërinë tonë. Dënim maksimal – asgjë më pak – për monstrumët e këtij akti”, ka shkruar Abdixhiku.
I trishtuar nga lajmi shokues i përdhunimit të një fëmije 11 vjeçe. Akt që kapërcen çdo ndjenjë njerëzore. Një alarm i dhimbshëm për shoqërinë tonë.
Dënim maksimal – asgjë më pak – për monstrumët e këtij akti.
— Lumir Abdixhiku (@LumirAbdixhiku) August 29, 2022
Ndërkaq, Policia e Kosovës ka bërë të ditur se pesë persona dyshohen se e kanë dhunuar seksualisht një të mitur në komunën e Prishtinës.
Kallxo.com, ka mësuar se viktima është vajzë e mitur e moshës 11-vjeçare.
Sipas mediumit në fjalë, dhunimi ka ndodhur nga ora 17:30 deri në 00:33, kështu viktima ka qenë viktimë e dhunës seksuale për shtatë orë.
Gjykata Themelore e Prishtinës, për Rtv Dukagjinin e ka konfirmuar masën e paraburgimit për dy të dyshuarit.
Në lidhje me këtë rast, zëdhënësja e Prokurorisë Themelore në Prishtinë, Laureta Ulaj, në një përgjigje me shkrim për Portalin Dukagjini ka thënë se prokurori i shtetit e ka caktuar masën e parabaurgimit për dy persona të dyshuar.
Për njërin nga të dyshuarit është kërkuar masa e paraburgimit prej 48 orëve, kurse për tjetrin, i cili sipas prokurorisë, është i moshës së mitur, 24 orë.
Të dy personat dyshohen se e kanë kryer veprën penale “Dhunimi”.
“Rastit të cilit i referoheni ju njoftojmë se me urdhër të prokurorit kujdestar nga Departamenti për të Mitur, janë ndaluar dy persona të dyshuar, personi madhor është ndaluar në kohëzgjatje prej 48 orësh, ndërsa i mituri në kohëzgjatje prej 24 orësh, për shkak të dyshimit se kanë kryer veprën penale ‘Dhunimi’, si dhe, ndaj të njëjtëve Prokurori i Shtetit ka paraqitur kërkesë për caktimin e masës së paraburgimit në gjykatën kompetente”, ka thënë Ulaj.
Ulaj ka bërë të ditur se për rastin në fjalë, janë “duke u ndërmarrë të gjitha veprimet e nevojshme hetimore në koordinim me të gjitha institucionet relevante”.
Tutje, ajo ka shtuar se meqë rasti ka të bëjë me procedurë për të mitur, nuk mund të jepen informata të tjera, për shkak të ruajtjes së integritetit të të miturve në procedurë.