Të enjten e 1 shtatorit, Prokuroria Themelore në Prishtinë, në lidhje me dhunimin e 11- vjeçares ka njoftuar se si rezultat i zhvillimit të hetimeve nga Prokurori i Shtetit në koordinim të plotë me institucionet e tjera relevante, janë dërguar në mbajtje pesë personat e dyshuar të përfshirë në këtë rast, prej tyre dy madhor dhe tre të tjerë të mitur, për shkak të veprës penale “Dhunimi”, sipas KPRK-së. Për të njëjtit, Prokurori i Shtetit ka kërkuar masën e paraburgimit në gjykatën kompetente, me ç ‘rast gjykata ka aprovuar kërkesën e prokurorisë.
Po ashtu, në njoftim thuhet se Prokurori i Shtetit në koordinim të plotë me institucionet relevante kanë ndërmarrë të gjitha masat e nevojshme për ofrimin e të gjitha shërbimeve për të dëmtuarën, kurse hetimet për këtë rast janë duke vazhduar deri në epilogun përfundimtar të kësaj çështjeje penale.
“Po ashtu, për hir të informimit të saktë, ju njoftojmë se në qershor të këtij viti, e mitura fillimisht është raportuar në stacionin policor në Prishtinë si person i zhdukur, me ç’ rast është njoftuar prokurori kujdestar nga Departamenti për të Mitur i kësaj prokurorie, i cili ka autorizuar policinë në ndërmarrjen e të gjitha veprimeve të nevojshme hetimore dhe e njëjta është gjetur e intervistuar në prezencë të punëtores sociale dhe mbrojtësit të viktimave, si dhe, më pas është dërguar në strehimore”, thuhet në njoftim.
Për këtë rast, në mënyrë urgjente, prokurori kujdestar ka ndërmarrë veprime konkrete hetimore, me qëllim të sqarimit të plotë, për të cilin janë lëshuar urdhëresa për ekzaminime dhe vlerësime të ndryshme.
Po ashtu, thuhet se në prezencë të psikologes, Qendrës për Punë Sociale dhe mbrojtësit të viktimave, e mitura është marrë në pyetje nga Prokurori i Shtetit dhe ndaj të njëjtit rast janë duke vazhduar hetimet.
Prokuroria ka bërë të ditur se të dy çështjet penale ndodhen në procese hetimore të ndara dhe i takojnë Procedurës për të Mitur, andaj, kufizimi i dhënies së informatave do të bëhet me qëllim të ruajtjes së integritetit të hetimeve dhe do të shmanget çdo publicitet i tepruar dhe informata që shpien në identifikimin e të miturve, pasi shkelin rëndë të drejtat e fëmijëve për privatësi dhe janë në kundërshtim me Kushtetutën, Ligjet dhe Konventat Ndërkombëtare për mbrojtjen e fëmijëve.
“Në fund, ju njoftojmë se të gjitha procedurat ku janë të përfshirë të miturit janë procedura konfidenciale dhe fshehtësia e informacionit lidhur me fëmijën viktimë apo dëshmitarë mbrohet me ligj, e po ashtu, secili informacion që priret të bëjë identifikimin e fëmijës si dëshmitar apo viktimë nuk botohet pa lejen e shprehur qartë të gjykatës”, thuhet më tutje.
Ndryshe, të mërkurën e 31 gushtit, RTV Dukagjini e ka siguruar aktgjykimin e datës 01.12.2020 për të dyshuarin Ekrem Rexhepi, i cili dyshohet për dhunimin e 11-vjeçares.
Thuhet se ai probleme të shumta u kishte shkaktuar edhe familjes së tij.
Sipas aktgjykimit të Gjykatës Themelore të Prishtinës, ai u dënua me burgim me kusht për shkak se kishte tentuar ta sulmonte motrën dhe vëllain e tij.
Sipas aktgjykimit të Gjykatës Themelore të Prishtinës, ai u dënua me burgim me kusht për shkak se kishte tentuar ta sulmonte motrën dhe vëllain e tij.