Aktivistët i kanë kërkuar FIFA-s që ta përjashtojë Iranin nga Kupa e Botës në Katar, për shkak të shtypjes ndaj grave.
Irani i cili është në të njëjtin grup me Anglinë dhe Uellsin në Katar, ka përjetuar një përmbytje protestash, pas vdekjes së gruas 22-vjeçare, Mahsa Amini, e cila ishte në paraburgim nga policia e moralit për mbajtjen e hixhabit në mënyrë të “papërshtatshme”.
Të paktën 83 persona janë vrarë përdemonstrimin e kodit të rreptë të veshjes së Republikës Islamike për gratë.
Këto thirrje për përjashtimin e Iranit nga Kupa e Botës vijnë një muaj pasi gratë u lejuan të ndiqnin një ndeshje vendase në stadiumin Azadi në Teheran, për herë të parë në më shumë se 40 vjet.
Por Open Stadiums, një lëvizje e grave iraniane që kërkon të lejojë gratë të ndjekin ndeshjet e futbollit, i kanë shkruar një letër presidentit të FIFA-s, Gianni Infantino, për të shprehur skepticizmin e tyre se stadiumet do të mbeten të hapura.
Në deklaratë thuhej “Gratë iraniane nuk u besojnë as autoriteteve të Republikës Islamike dhe as Federatës Iraniane të Futbollit se stadiumi Azadi do të mbetet i hapur për to, pas përfundimit të Kupës së Botës FIFA 2022″.
“Pse FIFA do t’i jepte shtetit iranian dhe përfaqësuesve të tij një skenë globale, ndërkohë që jo vetëm që refuzon të respektojë të drejtat dhe dinjitetet themelore të njeriut, por aktualisht po torturon dhe vret njerëzit e saj? Prandaj, ne i kërkojmë FIFA-s, bazuar në nenet 3 dhe 4 të statutet e saj, për të përjashtuar menjëherë Iranin nga Kupa e Botës 2022 në Katar”, vazhdon deklarata, shkruan Sky Sports.
Letra gjithashtu akuzonte Infantinon për “fjalë boshe”, pasi gratë ende mbeten “të mbyllura nga ‘loja jonë e bukur’ dhe të shtypura sistematikisht kur përpiqen të hyjnë në stadiume në Iran”.
Thirrjet për përjashtimin e Iranit nga Kupa e Botës u bënë jehonë nga “United for Navid”, një grup atletësh dhe aktivistësh iranianë të mërguar.
“FIFA e ka ndaluar Rusinë të marrë pjesë në garat ndërkombëtare, për shkak të pushtimit të Ukrainës dhe shkeljes së të drejtave të njeriut”, thuhet në deklaratë.
“Ne e respektojmë këtë qëndrim që ka marrë FIFA dhe se ajo nuk do të tolerojë vrasjen dhe torturimin e pakuptimtë të mijëra civilëve të pafajshëm. Ne sportistët iranianë kërkojmë që ju të aplikoni të njëjtën gjë për Republikën Islamike të Iranit”, vazhdon deklarata e tyre.
Më tej shtohet se “Irani po vret dhe torturon brutalisht protestuesit dhe po shtyp gratë, duke kriminalizuar shikimin e futbollit ose duke treguar disa fije flokësh. Heshtja e FIFA-s është një miratim i këtyre shkeljeve të të drejtave të njeriut”.
Të dy grupet i kujtuan FIFA-s rastin e Sahar Khodayari, e cila u dënua me burg për tentativën për të hyrë në një ndeshje futbolli e veshur si mashkull në vitin 2019. Më vonë, ajo vdiq pasi ia vuri flakën vetes në shenjë proteste.
“Shpresojmë se nuk e keni harruar ende vajzën tonë Blu, Sahar Khodayari”, thuhej në letrën e United for Navid.
“A ju kujtohet Sahar Khodayari, ndryshe si ‘Vajza Blu’? Edhe ajo u soll në paraburgimin e Votarës dhe u përball me burg para se të bënte vetëvrasje.”
Khodayari, 30 vjeç, u bë e njohur si “vajza blu” në rrjetet sociale për ngjyrat e ekipit të saj të preferuar Esteghlal.