Ndërmjet majit e shtatorit, pjesëtarët e rinj të policisë së Kosovës nga radhët e komunitetit serb, ishin në cak të presionit e kërcënimeve, të cilat ishin adresuar e dënuar publikisht nga krerët e shtetit të Kosovës.
Të njëjtat, kishin rezultuar me dorëheqjet e disave prej tyre, që kishin ofruar dorëheqjet e tyre nga Policia.
Por, ditë më parë zëvendësdrejtori i Policisë për veriun Veton Elshani, tha se policët e dorëhequr, e të cilëve akoma nuk u është aprovuar dorëheqja, kanë kërkuar rikthim e i cili u është aprovuar.
Megjithatë, zyrtarisht nga Policia e Kosovës, nuk janë përgjigjur as për numrin potencial të kërkesave për rikthim e as atyre të miratuara nëse ka të tilla.
Në lidhje me këtë situatë, në fuqi nga ky vit është një udhëzim administrativ mbi marrëdhënien e punës në Policinë e Kosovës, ku neni i 79 i të cilit e pamundëson rikthimin në punë të policëve të dorëhequr vullnetarisht.
Këtë e potencon edhe ish kryeshefi i IPK-së, njëherit ish zëvendësministër i brendshëm Valdet Hoxha, që thotë se të gjithë të dorëhequrit duhet të ndjekin procedurat nga fillimi.
“Policia e Kosovës nuk duhet të shërbehet me skenarët e një shteti fqinj, dhe nevojat e tyre ditore, për ti pasur punonjësit e tyre ne policinë e Kosovës, apo për ti urdhëruar që do të dorëhiqen, prandaj rregullat janë të qarta, çdokush që është larguar, vullnetarisht, është larguar përfundimisht pa kthim, ndaj çdo prurje e re, duhet ti nënshtrohet procedurave strikte konkurruese”, ka thënë Hoxha.
Selam Shkodra, gjithashtu ish zëvendës ministër i brendshëm thotë se rikthimi edhe mund të ndodhë pas një hetimi kredibil e në kohë të duhur.
“Rikthimi duhet të bëhet me kujdes dhe në kohën e duhur, në përputhje me dispozitat ligjore, siç kanë ekzistuar edhe në të kaluarën dyshimet, ekzistojnë edhe tash që një pjesë e tyre do të thotë, kanë qenë edhe pjesëtarë të policisë së Kosovës por edhe kanë bashkëpunuar me grupe të cilat kanë qenë, informale në pjesën veriore, dhe kohë pas kohe e kanë sabotu punën e policisë, të njëjtit kërkoj që të verifikohen një nga një nga institucionet e sigurisë”, ka thënë Shkodra.
Vala më e madhe e dorëheqjeve nga policia e Kosovës nga pjesëtarët e komunitetit serb, erdhi në nëntorin e vitit të kaluar, kur nën direktiva të Beogradit zyrtar, serbët u larguan nga institucionet kosovare.