Dështimi i projektit për ndërtimin e të cilit puna nisi 17 vjet më parë, Kosovës mund t’i kushtojë disa milionë euro.
Kështu ka vendosur Gjykata Ndërkombëtare e Arbitrazhit, vendim me të cilin nuk e kanë ndërmend të pajtohet institucionet e Kosovës.
“Avokatura Shtetërore e ka pranuar vendimin final të Gjykatës Ndërkombëtare të Arbitrazhit, (ICC). Vendimi i Arbitrazhit e obligon Republikën e Kosovës që t`ia paguaj Countur Global-it shumën prej 20,053,125.63 euro. Avokatura Shtetërore dhe përfaqësuesi ligjor i kontraktuar e kanë analizuar vendimin final të arbitrazhit dhe i njëjti do të sfidohet në gjykatën civile në Mbretërinë e Bashkuar”, thuhet në komunikatën e Ministrisë së Drejtësisë.
Edhe nëse ndiqet kjo rrugë, jursitët janë skeptik për rezultate pozitive.
“Është shumë e vështirë që bëhen lëshime gjatë vendosjes në arbitrazh, dhe këto lëshime janë sikur me e apelu një vendim të formës së prerë, që gjasat por edhe mundësitë ligjore për me e sfidu një vendim të arbitrazhit janë shumë të minimizuara dhe rezultatet janë gati se të pamundura”, ka thënë avokati, Qëndrim Arifi.
Arifi thotë se Kosova ka mundur ta shmang arbitrazhin, dhe të mos vijë në pozitë ku për shkak të një individi ose institucioni, shteti të paguajë dënime në vlerë milionëshe.
“Të mendohet mirë se në çfarë marrëdhënie kontraktuale hyjmë si shtet, dhe e dyta të mos tërhiqemi mirë pa i menduar mirë pasojat”, vijon ai.
Sipas Arifit tërheqja nga kontrata me një kompani kaq serioze mund të paraqes Kosovën si vend jo-serioz me pasiguri juridike.