Të premten, kryetari i Komisionit për Punë të Jashtme dhe Diasporë, Haki Abazi, në një konferencë për media ka adresuar vlerësimet e tij për çështjet me të cilat po përballet vendi, duke ngritur si shqetësim të tij, mosdhënien e hapësirës si deputet në Kuvendin e Kosovës.
Ai ka kërkuar largimin e Mimoza Kusari-Lila nga pozita e kryesues së grupit parlamentar të VV-së me arsyetimin se ajo nuk është deputete e VV-së dhe se nuk ka kohezion brenda atij grupi.
“Deputeti nuk është makineri votuese, ne duhet të krijojmë imunitet dhe kohezion me partitë opozitare”, ka deklaruar Abazi.
Ndër të tjera, ai ka thënë se debati në Kuvend duhet të bëhet për çështje të rëndësishme dhe përmbajtësore.
“Nuk ka të bëjë fare me mosangazhim e mospërgatitje, ka të bëjë me skenare që paraqiten në seancat plenare ose gjatë debateve që nuk lënë hapësirë për deputetët që të angazhohen”.
Dialogu duhet të ndahet nga proceset integruese
Ai ka diskutuar edhe për qasjen në dialogun dhe strategjitë e Qeverisë për energji në këtë krizë që po kalon vendi.
Sa i përket dialogut, ai ka thënë se duhet të ndahet nga proceset integruese.
“Liberalizimi i vizave, anëtarësimi i Kosovës në Këshillin e Evropës nuk mund të jenë peng i dialogut”, ka thënë ai.
Strategjia për energji, e trashëguar ndër vite
Ndërsa sa i përket krizës energjetike në Kosovë, ai ka thënë se strategjia për energji e qeverisë është përsëritje e togfjalëshit të 20 viteve të fundit.
“Kjo strategji e ka kryefjalën te ndërtimi i kapaciteteve të reja prej qymyrit që është në kundërshtim me agjendën e gjelbër të BE-së”.